ধুবুৰী,11 ডিচেম্বৰ: কেব বিৰোধিতা ধুবুৰীৰ ৰাজপথত অব্যাহত আছে উত্তপ্ত পৰিস্থিতি । আজি সন্ধিয়া হঠাৎ উত্তপ্ত হৈ পৰে ধুবুৰী চহৰ । চহৰ খনৰ জি টি বি পথৰ ধুবুৰী সাহিত্য সভা ভৱনৰ সন্মুখত অৰ্ধ শতাধিক যুৱ প্ৰজন্মই হাতে হাতে বেনাৰ প্লেকাৰ্ড লৈ ওলাই আহে ৰাজপথলৈ । লগতে শ্ৰেণীকোঠা আৰু পৰীক্ষা এৰি ৰাজপথতলৈ ওলাই আহিল লাখ লাখ ছাত্ৰ-ছাত্ৰী । ৰাজপথত অৱস্থান ধৰ্মঘট কাৰ্যসূচী ৰূপায়ণ কৰি কেব আৰু বিজেপি বিৰোধী শ্ল'গানেৰে উত্তাল কৰি তোলে পৰিস্থিতি । ইপিনে এনেদৰে প্ৰতিবাদ সাব্যস্ত কৰি থকাৰ সময়তে হঠাৎ অগ্নিগৰ্ভা হৈ পৰে পৰিস্থিতি । অৱশ্যে চাৰিওফালে আৰক্ষী প্ৰশাসন সক্ৰিয় হৈ থকাৰ ফলত পৰিস্থিতি নিয়ন্ত্ৰণ কৰিবলৈ সক্ষম হয় ।
মৰিগাঁও: কেবৰ বিৰোধীতাৰে আছু আৰু যুৱছাত্ৰ পৰিষদৰ উদ্যোগত বিশাল প্ৰতিবাদী সমদল । ডবা, কাঁহ,বৰতালৰ বজ্ৰ নিনাদত কঁপি উঠিল নিশাৰ মৰিগাঁও চহৰ। মৰিগাঁও গান্ধী ভৱন প্ৰাংগণৰ পৰা যাত্ৰা কৰা প্ৰতিবাদী দলটোৱে ডবা-কাহ, তাল লৈ ৰাজপথ উত্তাল কৰি শ্ল'গান দিলে চৰকাৰ বিৰোধী । কেইবা সহস্ৰাধিক প্ৰতিবাদকাৰীয়ে স্বতঃস্ফূৰ্ত ভাৱে প্ৰতিবাদী সমদলত যোগদান কৰাৰ পাছত চহৰখনৰ মাজমজিয়া পুলিচ পইণ্টত উঠি এক যুদ্ধ সদৃশ পৰিৱেশৰ মাজতে পাতিলে কেব বিৰোধী প্ৰতিবাদী সভা ।
গুৱাহাটী : বিমানবন্দৰলৈ যোৱা পথ অৱৰোধ কৰিলে প্ৰতিবাদকাৰীয়ে । কেৱৰ বিৰুদ্ধে এইবাৰ বৰঝাৰত স্বতস্ফূতভাৱে ওলাই আহিল ছাত্ৰ-ছাত্ৰীৰ লগতে জনসাধাৰণ । বিমানবন্দৰলৈ যোৱা পথ অৱৰোধ কৰিলে হাজাৰ-হাজাৰ প্ৰতিবাদকাৰীয়ে । হাজাৰ হাজাৰ প্ৰতিবাদকাৰীয়ে বিমানবন্দৰৰ পৰা আজাৰালৈ ৰাষ্ট্ৰীয় ঘাইপথযোগে পদযাত্ৰা কৰি সাব্যস্ত কৰিলে প্ৰতিবাদ ।
লগতে পঢ়ক:কেব বিৰোধী প্ৰতিবাদত উত্তপ্ত নগাওঁ
বাইহাটা: কেবৰ বিৰুদ্ধে হাতে হাতে জোঁৰ লৈ উত্তাল কৰিলে বাইহাটা চাৰিআলিৰ নিশাৰ আকাশ বতাহ । সদৌ অসম ছাত্ৰ সন্থাৰ উদ্যোগত কামৰূপ জিলা সাহিত্য সভা, বাইহাটা চাৰিআলি নাগৰিক সমিতি, জুবিনে ফেন ক্লাৱ লগতে বিভিন্ন দল সংগঠনৰ সহস্ৰাধিক লোকে চৰকাৰ বিৰোধী শ্ল'গানেৰে উত্তাল কৰি তোলে বাইহাটা চাৰি আলি । সমদলকাৰী সকলে বাইহাটা চাৰিআলিৰ চাৰিওটা ৰাজ পথতে জোঁৰ সমদলত বহু সময় ধৰি আবদ্ধ হৈ পৰে যান-বাহন ।
লগতে পঢ়ক:কেবৰ বিৰুদ্ধে অসমত গণ বিদ্ৰোহ
উল্লেখযোগ্য যে, ইতিমধ্যে অসমৰ 10 জিলাত ইণ্টাৰনেট সেৱা বন্ধৰ সিদ্ধান্ত গ্ৰহণৰ লগতে কামৰূপ মেট্ৰ জিলাত জাৰি কৰা হৈছে 144 ধাৰা ৷ চৰকাৰে সকলো প্ৰকাৰে চেষ্টা চলাইছে কেব বিৰোধী প্ৰতিবাদক দমন কৰাৰ ৷ কিন্তু ইয়াৰ পিছতো সমগ্ৰ ৰাজ্যত চলি পূৰ্ণদ্যমে কেব বিৰোধী প্ৰতিবাদ ৷
