Mukro violence issue: সীমা সমস্যা সমাধানৰ বাবে সকলোকে আগুৱাই অহাৰ আহ্বান প্ৰমোদ বড়োৰ

‘‘যিহেতু আমি একেখন ভাৰত ৰাষ্ট্ৰৰ অধীনতে আছোঁ, গতিকে এই সমস্যাৰ সমাধানৰ বাবে সকলোৱেই ধনাত্মকভাৱে আগবাঢ়িব লাগে । কাশ্মীৰৰ দৰে সমস্যাক সমাধান কৰিব পাৰিছে, তেনে ক্ষেত্ৰত অসমৰ লগত হোৱা মেঘালয়ৰ অথবা অৰুণাচল সমস্যাৰ সমাধান কৰিব নোৱাৰাৰ প্ৰশ্নই থাকিব নোৱাৰে’’ । এইদৰে উল্লেখ কৰি ইয়াৰ বাবে সকলো নেতৃত্বক আগুৱাই আহিবলৈ আহ্বান জনায় প্ৰমোদ বড়োৱে (BTC chief Pramod Boro) ৷

মৰিগাঁও, 28 নৱেম্বৰ: অসম আৰু মেঘালয়ৰ মাজত অব্যাহত থকা সংঘাত আৰু সীমা সমস্যা সন্দৰ্ভত মন্তব্য বিটিচি প্ৰধান প্ৰমোদ বড়োৰ (BTC chief Pramod Boro on Mukro violence) ৷ দেওবাৰে মৰিগাঁৱত এক অনুষ্ঠানত উপস্থিত হৈ তেওঁ কয়, ‘‘যিহেতু আমি একেখন ভাৰত ৰাষ্ট্ৰৰ অধীনতে আছোঁ, গতিকে এই সমস্যাৰ সকলোৱেই ধনাত্মকভাৱে আগবাঢ়িব লাগে । কাশ্মীৰৰ দৰে সমস্যাক সমাধান কৰিব পাৰিছে অসমৰ লগত হোৱা মেঘালয়ৰ অৰুণাচল সমস্যাৰ সমাধান কৰিব নোৱাৰাৰ প্ৰশ্ন থাকিব নোৱাৰে’’ । ইয়াৰ বাবে সকলো নেতৃত্বক আগুৱাই আহিবলৈ আহ্বান জনায় প্ৰমোদ বড়োৱে ৷

দেওবাৰে সীতা জখলা দুগ্ধ উৎপাদক সমবায় সমিতিৰ (Sitajakhala Dugdha Utpadak Samabai Samiti) এশ বছৰীয়া বৰ্ষপূৰ্তি অনুষ্ঠানত উপস্থিত থাকি এই আহ্বান জনাই প্ৰমোদ বড়োৱে ৷ লগতে বিটিচিৰ মুখ্য কাৰ্যবাহী সদস্যগৰাকীয়ে কয় যে, শ্বেত বিপ্লৱে কেৱল যে গাখীৰ উৎপাদনেই কৰিছে তেনে নহয় । গাখীৰ উৎপাদনৰ সমান্তৰালকৈ গাখীৰৰ দ্বাৰা উৎপাদিত বিভিন্ন খাদ্য সম্ভাৰ প্ৰস্তুত কৰি ইয়াৰ লগত জড়িত বহতো পৰিয়াল অৰ্থনৈতিক ভাৱে স্বাৱলম্বী হৈছে । মৰিগাঁৱৰ জাগীৰোডৰ সীতা জখলা দুগ্ধ উৎপাদন সমবায় সমিতি শ্বেত বিপ্লৱৰ প্ৰেৰণা বুলি তেওঁ মন্তব্য কৰে ।

উল্লেখ্য যে, যোৱা 22 নৱেম্বৰত অসমৰ পশ্চিম কাৰ্বি আংলং আৰু মেঘালয়ৰ পশ্চিম জয়ন্তীয়া পাহাৰৰ সীমান্তৰ মুক্ৰ’ত সংঘটিত হৈছিল এক গুলীয়াগুলীৰ ঘটনা ৷ জিৰিকিন্দিং আৰক্ষী থানাৰ অন্তৰ্গত সীমান্ত অঞ্চলত অসম আৰক্ষীৰ এটা টহলদাৰী দল আৰু বন বিভাগৰ এটা দলে জব্দ কৰিছিল এখন চোৰাং কাঠভৰ্তি ট্ৰাক (Firing at Assam Meghalaya border) ৷

কিন্তু সেই সময়তে বন মাফিয়া আৰু আৰক্ষীৰ দলৰ মাজত সৃষ্টি হয় বাক-বিতণ্ডাৰ ৷ পৰৱৰ্তী সময়ত পশ্চিম জয়ন্তীয়া পাহাৰৰ সীমান্তত বাস কৰা প্ৰায় তিনি শতাধিক লোকে ঘেৰাও কৰে অসম আৰক্ষী আৰু বন বিভাগৰ দলটোক ৷ লগতে ক্ষোভিত লোকসকলে আক্ৰমণ কৰিবলৈ উদ্যত হয় অসম আৰক্ষীৰ দলটোক ৷ যাৰ ফলত আত্মৰক্ষাৰ বাবে গুলী চলাবলৈ বাধ্য হয় আৰক্ষীৰ দলটোৱে ৷

অসম আৰক্ষীৰ গুলীত থিতাতে তিনিজন লোক নিহত হোৱাৰ লগতে আহত হয় আন কেইবাজনো লোক ৷ ইফালে মেঘালয়ৰ দলটোৰ আক্ৰমণত নিহত হয় অসমৰ এজন বনকৰ্মী ৷ তাৰ পাচতেই পৰিস্থিতি অধিক উত্তপ্ত হৈ পৰে ৷ আনহাতে, চিকিৎসালয়ত মৃত্যুক সাৱটি লয় মেঘালয়ৰ আন দুজন লোকে ৷ এই সংঘাতৰ পাচতেই মেঘালয়লৈ অসমৰ পৰা আটাইকেইটা পথেৰে বন্ধ কৰি দিয়া হয় যাতায়াত ব্যৱস্থা ৷ মেঘালয়ৰ কেইবাটাও স্থানত বন্ধ কৰি দিয়া হয় ইন্টাৰনেট সেৱা ৷

মেঘালয়ৰ মুখ্যমন্ত্ৰীয়ে এই ঘটনা সন্দৰ্ভত প্ৰতিক্ৰিয়া প্ৰকাশ কৰি অসম আৰক্ষীক দোষাৰোপ কৰে ৷ অসমৰ মুখ্যমন্ত্ৰীয়েও অসম আৰক্ষীয়ে ধৈৰ্য ধৰা উচিত আছিল বুলি মন্তব্য কৰে ৷ লগতে মৃত লোক কেইজনৰ পৰিয়াললৈ অসম চৰকাৰৰ তৰফৰ পৰা 5 লাখকৈ টকাৰ এককালীন সাহায্য ঘোষণা কৰে ৷ সমগ্ৰ ঘটনাৰ ন্যায়িক তদন্তৰ বাবে গুৱাহাটী উচ্চ ন্য়ায়ালয়ৰ অৱসৰপ্ৰাপ্ত ন্য়ায়াধীশ ৰুমী ফুকনৰ নেতৃত্বত এখন এজনীয়া কমিটী গঠন কৰি দুমাহৰ ভিতৰত প্ৰতিবেদন দাখিলৰ বাবে নিৰ্দেশ প্ৰদান কৰে অসম চৰকাৰে ৷

ইফালে, সমগ্ৰ ঘটনা সন্দৰ্ভত দিল্লীত কেন্দ্ৰীয় গৃহমন্ত্ৰী অমিত শ্বাহক সাক্ষাৎ কৰি ক্ষোভ প্ৰকাশ কৰে মেঘালয়ৰ মুখ্যমন্ত্ৰী কনৰাড চাংমাই ৷ লগতে এই ঘটনাৰ তদন্ত কেন্দ্ৰীয় সংস্থাৰ দ্বাৰা কৰিবলৈও আবেদন জনায় ৷ অসম চৰকাৰেও চিবিআইৰ দ্বাৰা ইয়াৰ আৰক্ষী পৰ্যায়ৰ এক তদন্ত কৰাৰ বাবে পোষকতা কৰে ৷ কেন্দ্ৰীয় গৃহ মন্ত্ৰণালয়ে চিবিআইক এই ঘটনাৰ তদন্তৰ দায়িত্ব প্ৰদানৰ আশ্বাস প্ৰদান কৰে ৷

ৰাজনৈতিকভাৱে এই সমস্যা সমাধানৰ চেষ্টা চলাই থকাৰ সময়তে, মেঘালয়ৰ বিভিন্ন স্থানত দেখা গ’ল হিংসাত্মক ঘটনা ৷ শ্বিলঙৰ সমীপৰ জালুপাৰাত একাংশ উত্তেজিত যুৱকে ঘটনা দিনা নিশাই জ্বলাই দিছিল অসমৰ এখন বাহন ৷ তাৰ পাচতে যোৱা বৃহস্পতিবাৰে শ্বিলং চহৰত আৰক্ষীৰ বাহনলৈ লক্ষ্য কৰি একাংশ প্ৰতিবাদকাৰীয়ে শিলগুটি আৰু পেট্ৰ’ল বোমা নিক্ষেপ কৰে ৷ প্ৰতিবাদকাৰীয়ে ক্ষতিসাধন কৰে মেঘালয় আৰক্ষীৰ তিনিখন বাহন ৷ অৱশ্যে দেওবাৰে বিয়লিভাগৰ পৰা মেঘালয়লৈ যাতায়াত মুকলি কৰি দিয়া হৈছে অসমৰ পৰা ৷

লগতে পঢ়ক: Assam Meghalaya Border violence : মৃত বিদ্যাছিং লকথেক বনবীৰ ঘোষণা কাৰ্বি আংলং স্বায়ত্ত পৰিষদৰ