মাজুলীত গড়কাপ্তানি পথ নিৰ্মানত অনিয়মঃ অভিযন্তাক ধমক জিলা উপায়ুক্তৰ

মাজুলীৰ পেৰাভাৰি বালিচাপৰিত পথ নিৰ্মাণত সংঘটিত হৈছিল প্ৰায় 40 লক্ষাধিক টকাৰ কেলেংকাৰী ৷ ইটিভি ভাৰতে 1 জুলাইত সবিস্তাৰে প্ৰকাশ কৰিছিল এই বাতৰি ৷ বাতৰিৰ পৰাই কামৰ নুমনা দেখি সেইস্থানত উপস্থিত হোৱাৰ লগতে কাম পৰিদৰ্শন কৰিলে জিলা উপায়ুক্ত দেৱপ্ৰসাদ মিশ্ৰই ৷

মাজুলী, 2 জুলাইঃ পথ নিৰ্মাণৰ নামত লক্ষাধিক টকা আত্মসাৎ কৰা ঠিকাদাৰৰ বিৰুদ্ধে জিলা উপায়ুক্তই তৰিব গোচৰ ৷ মাজুলীৰ উপায়ুক্ত দেৱপ্ৰসাদ মিশ্ৰই ঘোষণা কৰিছে এই কথা ৷ মঙলবাৰে মাজুলীৰ পেৰাভাৰি বালিচাপৰিত নিৰ্মীয়মান পথৰ কাম পৰিদৰ্শন কৰে উপায়ুক্তগৰাকীয়ে ৷ মাজুলীত উপস্থিত হোৱা জিলা উপায়ুক্তগৰাকীয়ে কামৰ নমুনা দেখি ধমক দিয়ে গড়কাপ্তানি বিভাগৰ কাৰ্যবাহী অভিযন্তা ৰানা শৰ্মা তথা ছেক্ছন অফিছাৰ সীমান্ত দত্তক ৷

উল্লেখ্য যে, ২০১৮ বৰ্ষৰ জুন মাহত জুৱেল বৰা নামৰ মাজুলীৰ বাহিৰৰ এগৰাকী ঠিকাদাৰে কেইবাটাও পথ মেৰামতিৰ বাবে প্ৰায় ১•২০ কোটি টকাৰ এক নিবিদা লাভ কৰিছিল । ইয়াৰ ভিতৰত আছিল প্ৰায় ৪০ লক্ষ্য টকাৰ বনগাঁও বালিচাপৰী পথৰ পেৰাভাৰি বালিচাপৰি অংশটো । কিন্তু স্থানীয় এগৰাকী বিজেপি নেতাৰ ভাতৃ উৎপল নাথক উক্ত কাম কৰিবলৈ দিয়ে জুৱেল বৰাই ৷ জুৱেল বৰাৰ সৈতে লগ-লাগি বিজেপি নেতাৰ ভাতৃ উৎপল নাথে এতিয়া এইদৰেই অব্যাহত ৰাখিছে লুন্ঠনৰাজ ৷

উল্লেখ্য যে, এই সম্পৰ্কে সোমবাৰে অৰ্থাৎ 1 জুলাই তাৰিখে ইটিভি ভাৰতত সবিস্তাৰে প্ৰকাশ পাইছিল এক প্ৰতিবেদন ৷ উক্ত প্ৰতিবেদন প্ৰকাশ পোৱাৰ পিচতেই আজি উক্ত কাম পৰিভ্ৰমণ কৰি বিভাগীয় অভিযন্তা তথা ঠিকাদাৰৰ বিৰুদ্ধে প্ৰয়োজনত গোচৰ তৰিব বুলিও ধমক দিয়ে জিলা উপায়ুক্ত দেৱপ্ৰসাদ মিশ্ৰই ৷

অধিক পঢ়কঃ কামৰ নমুনাঃ নিৰ্মাণৰ দুদিন পাচতে চপৰা-চপৰে এৰিছে বিটুমিনৰ প্ৰলেপ