মাজুলীত নিৰ্মীয়মান অৱস্থাতে চপৰা-চপৰে খহিছে পথ

উল্লেখ্য যে ৪ কোটি ৭৬ লাখ টকা ব্যয় সাপেক্ষে নিৰ্মাণ কৰি থকা এই পথটিয়ে বহন কৰিব নোৱাৰে কোনো ডাঙৰ গাড়ীৰ ভাৰ ৷ কেৱল চাইকেলৰ অনুমতি থকা এই পথটো নিৰ্মীয়মান অৱস্থাতে এনেদৰে চপৰা চপৰা খহি অহাত ক্ষুদ্ধ হৈ পৰিছে স্থানীয় ৰাইজ ৷

মাজুলী, 4 আগষ্টঃ শূন্য সহনশীলতাৰে দূৰ্নীতি অনিয়মৰ বিৰুদ্ধে কঠোৰ স্থিতি গ্ৰহণ কৰা খোদ মুখ্যমন্ত্ৰীৰ গৃহ সমষ্টি মাজুলীত বিভিন্ন উন্নয়নমূলক আঁচনিত সঘনাই সংঘটিত হৈ আহিছে দুৰ্নীতি ৷ সততে উন্নয়ন আৰু পৰিবৰ্তনৰ কথা কোৱা মুখ্যমন্ত্ৰী গৰাকীৰ গৃহ সমষ্টিৰ পথ নিৰ্মাণ ব্যাপক অনিয়ম ৷ চপৰা চপৰে খহিছে প্ৰধানমন্ত্ৰী গ্ৰাম্য চৰক যোজনাৰ অধীনৰ মুদৈগাও- ধৌৱাচলা বনগাঁৱৰ এই মূল পথছোৱা ৷ উল্লেখ্য যে ৪ কোটি ৭৬ লাখ টকা ব্যয় সাপেক্ষে নিৰ্মাণ কৰি থকা এই পথটিয়ে বহন কৰিব নোৱাৰে কোনো ডাঙৰ গাড়ীৰ ভাৰ ৷ কেৱল চাইকেলৰ অনুমতি থকা এই পথটো নিৰ্মীয়মান অৱস্থাতে এনেদৰে চপৰা চপৰা খহি অহাত ক্ষুদ্ধ হৈ পৰিছে স্থানীয় ৰাইজ ৷

উজনি মাজুলীৰ শতাধিক গাঁৱৰ যাতায়তৰ একমাত্ৰ পথটোৰে যদি অত্যাৱশ্যকীয় সামগ্ৰী কঢ়িয়াব নোৱাৰে তেন্তে এই পথ আমাক নালাগে বুলি পথটোৰ নিৰ্মাণ কাৰ্য আধাতে বন্ধ কৰিছে স্থানীয় ৰাইজে। এতিয়া মুখ্যমন্ত্ৰী সৰ্বানন্দ সোণোৱালৰ সমষ্টি মাজুলীত মন্ত্ৰী হিমন্ত বিশ্ব শৰ্মাৰ গড়কাপ্তানি বিভাগে ৰাইজৰ হৈ নহয় ঠিকাদাৰৰ হৈহে কাম কৰিছে বুলি অভিযোগ কৰিছে ৰাইজে।