মাজুলী, 23 মাৰ্চ : মাজুলীৰ জলসম্পদ বিভাগৰ কাৰ্যালয়ত অঘটন ৷ চোৰৰ এইবাৰ শেন চকু পৰিছে চৰকাৰী সামগ্ৰীৰ ওপৰত ৷ মঙলবাৰে মাজুলী জলসম্পদ বিভাগৰ কাৰ্যালয় চৌহদৰ পৰা নাইকিয়া হ'ল ৬ লাখ টকা মূল্যৰ জিঅ’ বেগ । বিভাগে খহনীয়া প্ৰতিৰোধৰ বাবে ক্ৰয় কৰা প্ৰায় ৬ লাখ টকা মূল্যৰ ৬০০ জিঅ' বেগ কাৰ্যালয়ৰ পৰাই অন্তৰ্ধান (Geo Bags theft from Government office in Majuli) হোৱা কাণ্ডই সমগ্ৰ মাজুলীতে চাঞ্চল্যৰ সৃষ্টি কৰিছে ।
৭০০ জিঅ’ বেগ মলয়া চাপৰিৰ খহনীয়া প্ৰতিৰোধৰ বাবে ক্ৰয় কৰি কাৰ্যালয়ৰ গুদাম থকাৰ পাচতো চৌহদতে মুকলিকৈ পেলাই থৈছিল দায়িত্বত থকা বিভাগীয় কৰ্মচাৰীয়ে ৷ তাৰ পৰাই নোহোৱা হ'ল প্ৰায় ৬০০ জিঅ' বেগ । গুৰুত্বপূৰ্ণ কথাটো হ’ল যে, জলসম্পদৰ কাৰ্যালয়ৰ কাষতে আছে CRPF বাহিনীৰ কেম্প ।
কিন্তু তাৰ মাজৰ পৰাই কোনে-কেনেকৈ চুৰি কৰিলে বৃহৎ সংখ্যক জিঅ'বেগ ? এই বিষয়টো বৰ্তমানেও ৰহস্যৰ আৱৰ্তত ৷ অৱশ্যে মাজুলীৰ জলসম্পদ বিভাগৰ কাৰ্যালয়ত কৰ্মৰত কাৰ্যবাহী অভিযন্ত্ৰাগৰাকীয়ে ঘটনা সন্দৰ্ভত গড়মূৰ আৰক্ষী চকীত দাখিল কৰিছে এক গোচৰ ।
ইতিমধ্যে আৰক্ষীয়ে এই সন্দৰ্ভত আৰম্ভ কৰিছে তদন্ত ৷ ইফালে এই চাঞ্চল্যকৰ চুৰি কাণ্ডৰ সৈতে উল্লেখিত বিভাগটোৰে একাংশ বিষয়া-কৰ্মচাৰী জড়িত থকাৰ সন্দেহ প্ৰকাশ কৰিছে সচেতন মহলে ৷
লগতে পঢ়ক : তামুলপুৰত তামোল চোৰৰ তাণ্ডৱ
