লখিমপুৰ, ২৯ জানুৱাৰী : লখিমপুৰত বালি আৰু বালিৰ বস্তাৰে ৰঙানদীক ভেঁটিবলৈ ঘাইপথ প্ৰাধিকৰণে লোৱা এক পদক্ষেপে (NHAI tries to prevent flow of Ranga river) জিলাখনত তীব্ৰ প্ৰতিক্ৰিয়াৰ সৃষ্টি কৰিছে । ৰাষ্ট্ৰীয় ঘাইপথ প্ৰাধিকৰণে প্ৰায় ২০ কোটি টকা ব্যয়ৰে ৰঙানদীৰ বক্ষত তিনিশ মিটাৰ ৰিং বান্ধ(NHAI Built dam in Ranga river) নিৰ্মাণ কৰিছে । নগৰখনৰ সমীপৰ পহুমৰাত পথৰ সুৰক্ষাৰ বাবে ৰঙানদীৰ বক্ষত বালিৰে ৰিং বান্ধ নিৰ্মাণ কৰি ঢকা হৈছে বালিৰ বস্তাৰে ।
বাৰিষা কালত যিখন নদীৰ ভয়ংকৰ সোঁতে পথ দলং, মথাউৰি আদি ভাঙি ছিঙি তাণ্ডৱ সৃষ্টি কৰাৰ লগতে ব্যাপক হাৰত ধন জনৰ হানি কৰি আহিছে সেইখন নদীক বালিৰে বান্ধিব খোজা হৈছে । জলসম্পদ বিভাগে ৩৬২ কোটি টকা ব্যয়ৰে আৰু বিদেশী প্ৰযুক্তি ব্যৱহাৰ কৰি জিঅ’ টিউব, জিঅ’ মেটেৰে নগৰখনৰ সুৰক্ষা কৱচস্বৰূপ মথাউৰি নিৰ্মাণ কৰিছে যদিও শংকা মুক্ত হ’ব পৰা নাই জনতা ।
বাৰিষা কালত এই মথাউৰিৰ প্ৰতিও ভাবুকিৰ সৃষ্টি কৰে নদীখনে । তেনে এখন নদীক ৰাষ্ট্ৰীয় ঘাইপথ প্ৰাধিকৰণে বালিৰে বান্ধিব খোজা কাৰ্যক তীব্ৰ ভাষাৰে সমালোচনা কৰিছে বিভিন্ন দল সংগঠনে । অবৈজ্ঞানিকভাৱে বালিৰে ৰিং বান্ধ নিৰ্মাণ কৰি ৰাষ্ট্ৰীয় ঘাইপথ প্ৰাধিকৰণে ২০ কোটি টকা অপচয় কৰিবলৈ লোৱা বুলি অভিযোগ তুলিছে জিলাখনৰ বিভিন্ন সংগঠনে ৷ তেওঁলোকে লগতে সময় থাকোতেই সঠিক ব্যৱস্থা লোৱাৰ দাবী জনাই অন্যথা তীব্ৰ গণতান্ত্ৰিক আন্দোলন গঢ়ি তোলাৰ হুংকাৰ দিয়ে প্ৰতিবাদকাৰীসকলে ৷
লগতে পঢ়ক : Jorhat Majuli bridge: দলং নিৰ্মাণত ক্ষতিগ্ৰস্ত সকলক উপযুক্ত ক্ষতিপূৰণ প্ৰদান নকৰাৰ অভিযোগ
