বিহপুৰীয়া,17 মাৰ্চ: বিহপুৰীয়া বিধানসভা সমষ্টিত বুধবাৰে কংগ্ৰেছ মহাজোঁটৰ প্ৰাৰ্থী ভূপেন কুমাৰ বৰাৰ হৈ আঞ্চলিক গণমৰ্চাৰ সভাপতি তথা ৰাজ্যসভাৰ সাংসদ অজিত কুমাৰ ভূঞাই নিৰ্বাচনী প্ৰচাৰ চলায় ৷ বিজেপিৰ বিৰুদ্ধে সৰৱ হৈ ৰাইজক বিজেপিক উৎখাত কৰাৰ বাবে ঐক্যবদ্ধ হ'বলৈ আহ্বান জনায় ৷
সমষ্টিটোৰ অন্তৰ্গত বৰবালি, বৰদেউৰী গাঁও, বদতি আৰু ধূণাগুৰিত নিৰ্বাচনী প্ৰচাৰত অংশগ্ৰহণ কৰি সাংসদগৰাকী বিজেপিৰ বিৰুদ্ধে সৰৱ হৈ পৰে ৷ বিজেপিক বিশ্বাসঘাতকতথা মিছলীয়া আখ্যা দি ভূঞাই বিজেপিক অসমৰ পৰা পুলিয়ে পোখাই উভালিব লাগিব বুলি মন্তব্য কৰে ৷
ভূপেন বৰাক আমি শিক্ষামন্ত্ৰী হোৱাটো বিচাৰিম বুলি মন্তব্য কৰি ভূঞাই লগতে কয় যে, বিজেপিক প্ৰতিহত কৰিবৰ কাৰণে সকলো প্ৰতিজ্ঞাবদ্ধ হ'ব লাগিব ৷ মহাজোঁটৰ চৰকাৰ হ'লে নাগৰিকত্ব সংশোধনী আইন বাতিল কৰা হ'ব বুলি এক তাৎপৰ্যপূৰ্ণ মন্তব্য কৰাৰ লগতে চাইকেল চলাই, কবিতা মাতি সঁচাক মিছা কৰিব নোৱাৰি বুলিও সাংসদ গৰাকীয়ে কটাক্ষ কৰে ৷
উল্লেখ্য যে, সমাগত নিৰ্বাচনৰ বাবে 'কা' আইনৰ বিষয়টো বিৰোধী ৰাজনৈতিক দলসমূহে বিজেপিৰ বিৰুদ্ধে এক অস্ত্ৰ হিচাপে ব্যৱহাৰ কৰা পৰিলক্ষিত হৈছে ৷ অৱশ্যে বিজেপিয়েও এইক্ষেত্ৰত নিজা মতেৰে আগবাঢ়িছে ৷ বুধবাৰে জকাইত এক নিৰ্বাচনী প্ৰচাৰ অনুষ্ঠানত ভাগ লৈ কেন্দ্ৰীয় মন্ত্ৰী ৰামেশ্বৰ তেলীয়ে অখিল বা লুৰিণ যিয়েই মুখ্যমন্ত্ৰী হ'লেও 'কা' বাতিল কৰিব নোৱাৰে বুলি কৰা মন্তব্য যেন ইয়াৰে প্ৰমাণ ৷
লগতে পঢ়ক: ন-কইনাৰ দৰে কংগ্ৰেছে আদৰিছে আজমলক: অতুল বৰা
