লখিমপুৰ, 25 মে’: বাৰিষাৰ প্ৰথমটো বানৰ কৱলত পৰিছে লখিমপুৰ জিলা । ৰঙানদী, সোৱণশিৰীৰ লগতে ফেনে-ফুটুকাৰে বাঢ়ি অহা বানত এতিয়া হাহাকাৰ অৱস্থা নৈপৰীয়া ৰাইজৰ । নেৰানেপেৰা বৰষুণৰ পিছত বানৰ আতংকই দেখা দিছে লখিমপুৰ জিলাত নৈৰ বাঢ়নী পানী কমিছে যদিও হাহাকাৰ পৰিস্থিতিৰ সৃষ্টি হৈছে ৰাইজৰ মাজত ।
কাকৈ নদী, সোমদিৰী নদীৰ বাঢ়নী পানীয়ে বিভীষিকাৰ সৃষ্টি কৰিছে 1 নং হিন্দু আদৰ্শ গাঁৱত । হিন্দু গাঁৱত ৰাইজৰ এতিয়া সাৰথি মাথোঁ নাঁওখন । আদৰ্শ গাঁওবাসীৰ ঘৰৰ ভিতৰত, চৌহদত, বাট-পথ সকলোতে এতিয়া পানী ।
বানৰ কবলত লখিমপুৰৰ নৈপৰীয়া ৰাইজৰ বিপত্তি
আদৰ্শ গাঁও যেন এতিয়া আদৰ্শ হৈ থকা নাই । সমস্যাৰ মাজত বিগত চাৰিদিন দিন পাৰ কৰিছে 153 টা পৰিয়ালে । কৰ’ণাৰ আতংকৰ মাজতে বানৰ আতংকই এতিয়া দিক-বিদিক হেৰুৱাই পেলাইছে আদৰ্শ গাঁওবাসীয়ে ৷
