ঢকুৱাখনা ,02 এপ্ৰিলঃৰাজ্যত পৰিৱৰ্তন হ'ল চৰকাৰ,পৰিৱৰ্তন হল মন্ত্ৰী-বিধায়ক, কিন্তু পৰিৱৰ্তন নহ'ল ঢকুৱাখনাৰ যাতায়ত ব্যৱস্থাৰ । মৰণত শৰণ দি ভঙা দলঙেৰে বিপদ সংকুল যাতায়ত ঢকুৱাখনাবাসী ৰাইজৰ । প্ৰাক্তন মন্ত্ৰী ভৰত নৰহৰ দীৰ্ঘদিনীয়া অপশাসনক উফৰাই ঢকুৱাখনা ৰাইজে ঢকুৱাখনালৈ আনিছিল ৰাজনৈতিক পৰিৱৰ্তন । ঢকুৱাখনা সমষ্টিৰ বিধায়ক হ'ল মন্ত্ৰী নৱ দলে। কিন্তু নহ'ল বাট-পথহে ৷
দুই বছৰৰ পূৰ্বে প্ৰলয়ংকাৰী বানে উটুৱাই নিছিল ঢকুৱাখনাৰ বৰদৈবাম তিনিআলিৰ পৰা ঐতিহ্যমণ্ডিত বাসুদেৱ থান সংযোগী গড়কাপ্তানী পথটোৰ গা-দাঙৰ চুকত থকা দলংখনৰ দুয়োটা মূৰ ৷ বানে দলংখন উটুৱাই নিয়াৰ পাচতে তৎকালীন ভাৱে দলংখন মেৰামতিৰ প্ৰতিশ্ৰুতি দিছিল বিধায়ক নৱ দলেই ৷ কিন্তু প্ৰতিশ্ৰুতি দিয়েই দায়িত্ব সামৰিলে বিধায়ক গৰাকীয়ে ৷ ফলত বৰ্তমানেও দলংখনেৰে বিপদসংকুল যাতায়ত কৰি আহিছে পথটোৰে অহা যোৱা কৰা যাত্ৰীসকলে ৷ বহু সময়ত দলংখনেৰে পাৰাপাৰ হওঁতে কেইবাটাও দুৰ্ঘটনাও সংঘটিত হৈছে ৷ অঞ্চলবাসীৰ বাবেবাৰিষাৰ সময়ত নাওখনেই হৈ পৰে একমাত্ৰ ভৰষা ৷ ঢকুৱাখনাৰ এক গুৰুত্বপূৰ্ণ পৰ্যটনথলী হিচাপে বিবেচিত বাসুদেৱ থানলৈ যোৱা এই পথটোৰ এনে দুৰৱস্থাত ক্ষোভিত হৈছে ঢকুৱাখনাৰ সচেতন লোক ৷
