লখিমপুৰ, 22 মে': কৰ'ণাৰ আতংকৰ মাজতে বৃহস্পতিবাৰে নিশাৰে পৰা হোৱা ধৰাষাৰ বৰষুণে বানৰ সৃষ্টি কৰিছে ৰাজ্যৰ বহু জিলাত ৷ আন বহু জিলাৰ সমান্তৰালকৈ লখিমপুৰত জিলাতো আৰম্ভ হৈছে বানৰ তাণ্ডৱ ৷ ৰঙানদী, শিঙৰা, সোৱণশিৰীৰ বাঢ়নী পানীয়ে ইতিমধ্যেই উটুৱাই নিছে বহু কেইখন গাঁৱৰ একমাত্ৰ যোগাযোগৰ আহিলা বাহৰ দলং৷ শুকুৰবাৰৰ পুৱতি নিশাৰে পৰা বানত বুৰ গৈছে লখিমপুৰ জিলাৰ 1 নং ডিৰ্জুৰ লগতে ডিৰ্জু পথাৰ বিস্তীৰ্ণ অঞ্চলৰ বড়ো ধানৰ খেতি ৷
কৰ'ণাৰ আতংকৰ মাজতে লখিমপুৰত বানৰ তাণ্ডৱ
ইয়াৰ উপৰিও প্ৰায় আটাইকেইখন নদীতে জলস্তৰ বৃদ্ধি পোৱাত লখিমপুৰৰ জিলাৰ নৈ পৰিয়া আমতলা, দুৱাৰপাৰ, জৈনপুৰ আদি অঞ্চলৰ প্ৰতি আহিছে ব্যাপক ভাবুকি ৷ অৰুণাচলত নিপকোৱে পানী এৰি থাকিলে পৰিস্থিতি অধিক জটিল হোৱাৰ আশংকা কৰিছে নৈ পৰীয়া ৰাইজে ৷
