লখিমপুৰ,১৮ মে': কৰ'ণাৰ দ্বিতীয় লহৰে ভয়ানক পৰিস্থিতি ধাৰণ কৰিছে সমগ্ৰ দেশতে । অসমৰ প্ৰান্তে প্ৰান্তে মহামাৰীয়ে লৈছে ভয়ংকৰ ৰূপ । প্ৰতিদিনে ৰাজ্যত কৰ’ণাত আক্ৰান্ত হৈ মৃত্যু হৈছে বিভিন্নজনৰ । লখিমপুৰ জিলাৰ নাৰায়ণপুৰত পুনৰ কৰ'ণা আক্ৰান্ত হৈ মৃত্যুক আঁকোৱালি ল'লে এগৰাকী ব্যক্তিয়ে । লোকজনৰ নাম কুমুদ বৰা । বিগত প্ৰায় ১৫ দিন ধৰি হোম হোম আইচ'লেচনত আছিল ৮৬ বছৰীয়া কুমুদ বৰা ।
কিন্তু পুৱা স্বাস্থ্যৰ যথেষ্ট অৱনতি ঘটে আৰু মৃত্যু হয় লোকজনৰ । মৃত্যুৰ পিছত তেওঁৰ স্বাস্থ্য পৰীক্ষা কৰা হয় আৰু পুনৰ দেহত ক'ভিড-১৯ ভাইৰাছৰ অৱস্থিতি ধৰা পৰে । ইফালে মৃত কুমুদ বৰাৰ এজন পুত্ৰ আৰু এগৰাকী নাতিৰ দেহতো ধৰা পৰিছে ভাইৰাছৰ অৱস্থিতি । ইয়াৰ পিছত এতিয়া সমগ্ৰ অঞ্চলতে আতংকময় পৰিৱেশে বিৰাজ কৰিছে ।
জানিব পৰা মতে, এই পৰ্যন্ত নাৰায়ণপুৰত ২৭৯ গৰাকী লোক কৰ'ণাত আক্ৰান্ত হৈছে ৷
লগতে পঢ়ক: কৰ’ণাত আক্ৰান্ত হৈ লংকা পৌৰসভাৰ প্ৰাক্তন উপাধ্যক্ষৰ মৃত্যু
