কোকৰাঝাৰ, 27 ডিচেম্বৰ : সাৰ্বভৌম কমতাপুৰ ৰাষ্ট্ৰৰ দাবীত সশস্ত্ৰ সংগ্ৰাম কৰা কে এল অ' বিদ্ৰোহী গোটে বৃহস্পতিবাৰে সংগঠনটোৰ হকে আত্মবলিদান দি শ্বহীদ হোৱা বীৰসকলক ৰোমন্থন কৰি ২৬ সংখ্যক শ্বহীদ দিৱস উদযাপন কৰে ৷ চৰকাৰৰ সৈতে শান্তি আলোচনাৰে সমাজৰ ঘাই সুঁতিত উভতি অহা প্ৰাক্তন কে এল অ' গোটৰ উমৈহতীয়া মঞ্চ 'প্ৰাক্তন কেএলঅ' সমন্বয়ৰক্ষী মৰ্চাই' পুৱাৰ ভাগত বিটিএডিৰ সদৰ কোকৰাঝাৰ চহৰৰ চন্দ্ৰপাৰাস্থিত বিজুলীবাৰীত পোন প্ৰথমবাৰৰ বাবে এই দিৱস উদযাপন কৰে ৷ এই উপলক্ষে বৃহস্পতিবাৰে পুৱা চন্দ্ৰপাৰাত সশস্ত্ৰ সংগঠনটোৰ পতাকা আৰু শ্বহীদ বেদীত বন্তি প্ৰজ্বলন আৰু মালা অৰ্পণ কৰা হয় ৷ এই অনুষ্ঠানৰ শুভাৰম্ভ কৰে প্ৰাক্তন কে এল অ' সমন্বয়ৰক্ষী মৰ্চাৰ কেন্দ্ৰীয় সভাপতি আৰু সম্পাদক ক্ৰমে খগেন চন্দ্ৰ ৰায় আৰু হৰেশ্বৰ বৰ্মনে ৷
এই অনুষ্ঠানতে সশস্ত্ৰ সংগ্ৰামত আত্মবলিদান দিয়া শ্বহীদ বীৰসকলৰ ত্যাগক সোঁৱৰণ কৰি শেহতীয়াকৈ অসম চৰকাৰে অবিভক্ত গোৱালপাৰা জিলাক সামৰি গঠন কৰিবলগা কমতাপুৰ স্বায়ত্ব শাসিত পৰিষদৰ ঘোষণাক সকলোৱে আদৰনি জনায় ৷ ইয়াৰোপৰি,অবিভক্ত গোৱালপাৰা জিলাৰ তাহানিৰ অন্যতম কোকৰাঝাৰ আৰু চিৰাং জিলা দুখন বিটিএডিত অন্তৰ্ভুক্ত হোৱাৰ পৰা বাদ পৰা আৰু প্ৰাক্তন কে এল ওই উক্ত দুই জিলাৰ কোচ ৰাজবংশী জনগোষ্ঠীৰ লোককো স্বায়ত্ত শাসিত পৰিষদত সম মৰ্যদা প্ৰদানৰ দাবী তোলে ৷ প্ৰাক্তন কে এল অ'ৰ নেতাদ্বয়ে প্ৰস্তাৱিত কমতাপুৰ স্বায়ত্ত শাসিত পৰিষদ গঠনৰ প্ৰক্ৰিয়াত প্ৰাক্তন কে এল অ'ৰ নেতা সদস্যসকলকো সামৰি ল'বলৈ অচিৰে মুখ্যমন্ত্ৰীৰ সৈতে আলোচনাত বহাৰ ইচ্ছা প্ৰকাশ কৰে ৷
শ্বহীদ দিৱসৰ দিনতে প্ৰাক্তন কে এল অ' সমন্বয়ৰক্ষী মৰ্চাই সাৰ্বভৌম কমতাপুৰ ৰাষ্ট্ৰৰ দাবীত অটব্য অৰণ্যত থাকি সশস্ত্ৰ সংগ্ৰাম অব্যাহত ৰখা সতীৰ্থ সংগ্ৰামী সকলকো চৰকাৰৰ সৈতে আলাপ-আলোচনাৰে সমস্যা সমাধানৰ বাবে আগবাঢ়ি অহাৰ মুকলি আহ্বান জনায় ৷ মৰ্চাৰ দুই নেতাদ্বয়ে কেন্দ্ৰীয় আৰু ৰাজ্য চৰকাৰকো ভূমিপুত্ৰ কোচ ৰাজবংশী জনগোষ্ঠীৰ দীৰ্ঘদিনীয়া জনজাতিকৰণৰ মৰ্যাদাৰ দাবীক ৰূপায়ণ কৰাৰ প্ৰবল দাবী উত্থাপন কৰে ৷ প্ৰাক্তন কে এল অ'ৰ শ্বহীদ দিৱসৰ সৈতে সংগতি ৰাখি কে এল অ'ৰ সাংগঠনিক পতাকা উত্তোলন কৰে খগেন চন্দ্ৰ ৰায় আৰু স্বগোষ্ঠীয় জাতীয় পতাকা উত্তোলন কৰে হৰেশ্বৰ বৰ্মনে ৷ আনহাতে,শ্বহীদ বেদীত মালা অপৰ্ণ কৰে কেন্দ্ৰীয় উপদেষ্টা বিমল ৰায় আৰু বন্তি প্ৰজ্বলন কৰে কেন্দ্ৰীয় সাংগঠনিক সম্পাদক দয়াল বৰ্মনে ৷
বৃহস্পতিবাৰৰ অনুষ্ঠানত প্ৰাক্তন কে এল ও সমন্বয়ৰক্ষী মৰ্চাই সতীৰ্থ শ্বহীদ সমৰ ৰায়ৰ মাতৃ লিবেশ্বৰ ৰায়কো জাতীয় গামোচাৰে সম্বৰ্ধনা জনায় ৷ এই অনুষ্ঠানত উপস্থিত থাকে কোকৰাঝাৰ জিলা সমিতিৰ সভাপতি মৃদুল ৰায়,বিজুলীবাৰীৰ গাঁওবুঢ়া শ্বহীদ ৰায় আৰু অৰ্দ্ধ শতাধিক প্ৰাক্তন কে এল ও কেডাৰ,সমৰ্থক আৰু ৰাইজ ৷
আৰু পঢ়ক : স্বদেশ প্ৰেমৰ গীতেৰে "CAA" ৰ বিৰুদ্ধে শিল্পীৰ প্ৰতিবাদ
