সাংসদ নৱ শৰণীয়াৰ সমৰ্থকৰ বিৰুদ্ধে আইনী ব্যৱস্থা লোৱাৰ হুংকাৰ প্ৰাৰ্থী শব্দ ৰাভাৰ

সাংসদ নৱ কুমাৰ শৰণীয়াৰ অন্ধ ভক্ত তথা একাংশ সমৰ্থকে তেওঁৰ বিৰুদ্ধে অপপ্ৰচাৰ চলাই ৰাইজক বিভ্ৰান্ত কৰা মন্তব্য কৰে প্ৰাৰ্থী শব্দ ৰাম ৰাভাই  ৷ এই কাৰ্যক তীব্ৰ নিন্দা কৰি অচিৰেই সেই সকলৰ বিৰুদ্ধে আইনী ব্যৱস্থা ল'ব বুলি সকীয়াই দিয়ে শব্দ ৰাম ৰাভাই ৷

কোকৰাঝাৰ,12 এপ্ৰিল : সাংসদ নৱ কুমাৰ শৰণীয়াৰ সমৰ্থক সকলৰ বিৰুদ্ধে আইনী ব্যৱস্থা লোৱাৰ হুংকাৰ কংগ্ৰেছ প্ৰাৰ্থী শব্দ ৰাম ৰাভাৰ ৷ শুকুৰবাৰে কোকৰাঝাৰ চহৰৰ ৰনেন্দ্ৰ ভৱনত আয়োজিত এক সংবাদ মেলত শব্দ ৰাম ৰাভাই তীব্ৰ প্ৰতিক্ৰিয়া প্ৰকাশ কৰি ছ'চিয়েল মিডিয়াত সাংসদ নৱ কুমাৰ শৰণীয়াৰ অন্ধ ভক্ত তথা একাংশ সমৰ্থকে তেওঁৰ বিৰুদ্ধে অপপ্ৰচাৰ চলাই ৰাইজক বিভ্ৰান্তি কৰিছে বুলি মন্তব্য কৰে ৷

শব্দ ৰাম ৰাভাই অভিযোগ কৰা মতে নৱ কুমাৰ শৰণীয়াই নিৰ্বাচনত পৰাজয় বৰণ কৰাৰ উমান পাই শেহতীয়াকৈ তেওঁৰ সমৰ্থকৰ দ্বাৰা ছ'চিয়েল মিডিয়াত অপপ্ৰচাৰ চলাই তেওঁক জনমানসত হেয় প্ৰতিপন্ন কৰিবলৈ চেষ্টা চলাইছে ৷ শব্দ ৰাম ৰাভাই অভিযোগ কৰা মতে 2010 চনত তেওঁ পৃথক বড়োলেণ্ড ৰাজ্য গঠন হোৱাৰ সমৰ্থনত কেন্দ্ৰীয় চৰকাৰক এখন পত্ৰ প্ৰেৰণ কৰিছিল বুলি ছ'চিয়েল মিডিয়া যোগে নৱ কুমাৰ শৰণীয়াৰ সমৰ্থক সকলে ভুৱা প্ৰচাৰ চলাই বিভ্ৰান্তিৰ সৃষ্টি কৰিছে ৷ এই কাৰ্যক তীব্ৰ নিন্দা কৰি অচিৰেই সেই সকলৰ বিৰুদ্ধে আইনী ব্যৱস্থা ল'ব বুলি সকিয়াই দিছে শব্দ ৰাম ৰাভাই ৷ এইবাৰ পাঁচ নং কোকৰাঝাৰ লোকসভা সমষ্টিত তেওঁৰ মূল প্ৰতিদ্বন্দ্বী এবছু সমৰ্থিত প্ৰাৰ্থী ইউপিপিএলৰ উৰ্খাও গৌৰা ব্ৰহ্ম হ'ব বুলি স্পষ্ট কৰি তৃতীয় স্থানত বিপিএফৰ প্ৰাৰ্থী প্ৰমিলাৰাণী ব্ৰহ্ম থাকিব বুলি ভৱিষ্যতবাণী দি তেওঁৰ জয় নিশ্চিত বুলি দাবী কৰিছে শব্দ ৰাম ৰাভাই ৷ আনহাতে বড়ো আৰু অবড়োক লৈ ৰাজনীতি কৰা নৱ কুমাৰ শৰণীয়া এইবাৰ চতুৰ্থ নতুবা পঞ্চম স্থানহে থাকিব বুলি স্পষ্টকৈ উল্লেখ কৰিছে শব্দ ৰাম ৰাভাই ৷