কোকৰাঝাৰ,2 এপ্ৰিল : 30 নং কোকৰাঝাৰ পূৱ বিধানসভা সমষ্টিৰ ইউপিপিএলৰ প্ৰাৰ্থী লৰেন্স ইছলাৰীৰ সপক্ষে নিৰ্বাচনী প্ৰচাৰ চলাবলৈ শুকুৰবাৰে কোকৰাঝাৰত উপস্থিত হয় মন্ত্ৰী ড৹ হিমন্ত বিশ্ব শৰ্মা ৷ কোকৰাঝাৰ সদৰ চহৰৰ শান্তিনগৰৰ হিম্মৎসিংকা খেলপথাৰত অনুষ্ঠিত হোৱা নিৰ্বাচনী সভাত এইবাৰ ইউপিপিএলৰ প্ৰাৰ্থী লৰেন্স ইছলাৰীৰ বিজয় নিশ্চিত বুলি দাবী কৰে মন্ত্ৰী হিমন্তই ।
নিৰ্বাচনী ভাষণত হিতাধিকাৰীয়ে লোৱা বন্ধন বেংকৰ ঋণ চৰকাৰে ঘূৰাই দিয়া, বিশ্ববিদ্যালয়ৰ ছাত্ৰীক স্কুটী, ল’ৰাক মটৰ চাইকেল দিয়াকে ধৰি কেবাটাও প্ৰতিশ্ৰুতি প্ৰদান কৰে মন্ত্ৰী হিমন্ত বিশ্ব শৰ্মাই । প্ৰমোদ বড়োৰ নেৰ্তৃত্বত বিটিটিত শান্তি প্ৰতিষ্ঠা হৈছে আৰু সকলো জাতি জনগোষ্ঠীয়ে সমমৰ্যদা, সম উন্নয়নৰ সুবিধা লাভ কৰিছে বুলি উল্লেখ কৰি নাঙল মিউজিয়ামলৈ যাব আৰু ট্ৰেক্টৰ-পদুম দিছপুৰলৈ যাব বুলি মন্তব্য কৰে মন্ত্ৰী গৰাকীয়ে ।
মন্ত্ৰী হিমন্ত বিশ্ব শৰ্মা সৈতে বিটিটিৰ মুখ্য কাৰ্যবাহী প্ৰমোদ বড়ো, প্ৰাৰ্থী লৰেঞ্চ ইছলাৰী, বিশ্বজিৎ দৈমাৰী আৰু আন কেইবাগৰাকী নেতাই জীপত উঠি কোকৰাঝাৰ সদৰ চহৰত ৰোড শ্ব’ কৰে । হাজাৰ হাজাৰ সমৰ্থকেৰে পৰিবেষ্টিত হৈ মন্ত্ৰী হিমন্ত বিশ্বই ইউপিপিএল প্ৰাৰ্থীৰ হৈ ৰোড শ্ব' কৰি নিৰ্বাচনী প্ৰচাৰ তুংগত কৰি তোলা পৰিলক্ষিত হয় ৷
লগতে পঢ়ক : মন্ত্ৰী হিমন্তক নাইট ক্লাৱলৈ পঠিয়াব আজমলে
