কোকৰাঝাৰ, ১৪ ফেব্ৰুৱাৰী: বিটিআৰ পৰিষদীয় চৰকাৰে শেহতীয়াকৈ প্ৰদান কৰা শিক্ষক নিযুক্তিকৰণৰ পৰা বহু শিক্ষক বঞ্চিত হোৱাৰ লগতে প্ৰাদেশীকৰণৰ পৰা বহু শিক্ষানুষ্ঠান বাদ পৰাক লৈ তীব্ৰ প্ৰতিক্ৰিয়া প্ৰকাশ কৰিছে বিটিআৰ শিক্ষক কৰ্মচাৰী ঐক্যমঞ্চই ৷
দেওবাৰে বিটিআৰ শিক্ষক কৰ্মচাৰী ঐক্যমঞ্চৰ এক সাধাৰণ সভা অনুষ্ঠিত কৰা হয় ৷ উক্ত সভাতে বিষয়টোক লৈ তীব্ৰ ক্ষোভ আৰু অসন্তুষ্টি প্ৰকাশ কৰে বিটিআৰ শিক্ষক কৰ্মচাৰী ঐক্যমঞ্চই ।
বিটিআৰ পৰিষদীয় চৰকাৰে প্ৰদান কৰা নিযুক্তি পত্ৰৰ দ্বাৰা বিদ্যালয়সমুহ ভাঙি দিয়াৰ হে ইংগিত প্ৰদান কৰিছে বুলি বিবৃতিত উল্লেখ কৰি নিযুক্তি পত্ৰৰ দ্বাৰা এচাম ছাত্ৰ-ছাত্ৰীক শিক্ষাৰ মৌলিক অধিকাৰৰ পৰাও বঞ্চিত কৰা হৈছে বুলি অভিযোগ কৰে মঞ্চৰ সভাপতি গৰাকীয়ে ৷ লগতে ইয়াৰ দ্বাৰা পদ প্ৰাদেশীকৰণৰ নামতো বঞ্চনাহে কৰা হৈছে বুলি বিবৃতি খনত উল্লেখ কৰা হয় ।
ইয়াৰ উপৰিও এই নিযুক্তি পত্ৰৰ যোগেদি প্ৰাথমিক বিদ্যালয়ৰ পৰা মহাবিদ্যালয়লৈকে টিউটৰ হিচাপে নিযুক্তি দি শিক্ষকসকলক অপমান কৰা হৈছে বুলি বিবৃতিত উল্লেখ কৰে শিক্ষক ঐক্যমঞ্চৰ সভাপতি গৰাকীয়ে । ইফালে বিটিআৰ অঞ্চলৰ যিবোৰ বিদ্যালয় প্ৰাদেশীকৰণৰ পৰা বাদ পৰিছে সেইবোৰ বিদ্যালয়ক অহা ২০ ফেব্ৰুৱাৰী ভিতৰত প্ৰাদেশীকৰণ কৰিবলৈ দাবী জনাইছে ৷ লগতে বিনা বেতনে অৱসৰ লোৱা শিক্ষকসকল এককালীন ১৫ লাখ টকাৰ আৰ্থিক সাহাৰ্য প্ৰদান কৰিবলৈও দাবী জনাই বিটিআৰ শিক্ষক-কৰ্মচাৰী ঐক্যমঞ্চৰ সভাপতি বুধিৰাম ব্ৰহ্মই ।
উল্লেখ যে, বিটিআৰ পৰিষদীয় চৰকাৰে যোৱা ৮ ফেব্ৰুৱাৰীত এক অনুষ্ঠানৰ জৰিয়তে বিটিআৰৰ চাৰি জিলাৰ ৬৭৬ খন শিক্ষানুষ্ঠান প্ৰাদেশীকৰণ কৰাৰ লগতে ২১৬০ গৰাকী শিক্ষক-কৰ্মচাৰীক চাকৰি নিয়মীয়াকৰণৰ নিযুক্ত পত্ৰ প্ৰদান কৰিছিল ৷
লগতে পঢ়ক:গুৱাহাটীত উপস্থিত ড৹ এছ জয়শংকৰ আৰু জাপানৰ ৰাষ্ট্ৰদূত
