কোকৰাঝাৰ,9 নৱেম্বৰ: বিটিএডি অঞ্চলত বসবাস কৰা নাথ-যোগী সম্প্ৰদায়ৰ লোকসকলৰ আৰ্থ সামাজিক, সাংস্কৃতিক, শৈক্ষিক আদি বিভিন্ন ধৰণৰ সমস্যা সমাধানৰ ক্ষেত্ৰত মাত মাতি অহা অন্যতম অনুষ্ঠান হৈছে সদৌ বিটিএডি নাথ-যোগী সন্মিলনী ৷ এই সংগঠনৰ ভাতৃ সংগঠন দুটা হৈছে যুৱ সন্মিলনী আৰু মহিলা সন্মিলনী ৷ এই তিনিওটা সংগঠনৰে নৱ-নিৰ্বাচিত বিষয়-ববীয়াসকলে সোমবাৰে আনুষ্ঠানিকভাৱে শপত গ্ৰহণ কৰে ৷
কোকৰাঝাৰ চহৰৰ নাতিদূৰৈত অৱস্থিত ভূটীয়াপাৰাৰ শিৱশক্তি ভৱনত সদৌ বিটিএডি নাথ-যোগী সন্মিলনীৰ নৱ-নিৰ্বাচিত সভাপতি পিয়লি ফুকন নাথ আৰু সদৌ অসম প্ৰাদেশিক নাথ-যোগী সন্মিলনীৰ সভাপতি ড৹ অৰুণ বৰা নাথৰ উপস্থিতিত বিটিএডিৰ চাৰি জিলাৰে নৱ-নিৰ্বাচিত বিষয়-ববীয়াসকলে শপত বাক্য পাঠ কৰি দায়িত্ব গ্ৰহণ কৰে ৷
উল্লেখ্য যে, পিয়লি ফুকন নাথক সভাপতি, উমেশ শইকীয়াক সাধাৰণ সম্পাদক হিচাপে লৈ সদৌ বিটিএডি নাথ-যোগী সন্মিলনী, জয়ন্ত নাথক সভাপতি, প্ৰমোদ চন্দ্ৰ নাথক সাধাৰণ সম্পাদক হিচাপে লৈ সদৌ বিটিএডি নাথ-যোগী যুৱ সন্মিলনী আৰু হিমানী নাথক সভানেত্ৰী, পূৰ্ণিমা নাথক সম্পাদিকা হিচাপে লৈ সদৌ বিটিএডি নাথ-যোগী মহিলা সন্মিলনীৰ 34 জনীয়া নৱ-নিৰ্বাচিত সমিতিখন গঠন কৰা হৈছে ৷
লগতে চাওকঃ সেউজ ন্যায়াধীকৰণৰ নিৰ্দেশক আওকাণ কৰি মহানগৰীত মজুত ফটকা
