কোকৰাঝাৰ, 26 অক্টোবৰ: অশুভ শক্তিৰ প্ৰতীক মহিষাসুৰক বধ কৰি আজি দেৱী দুৰ্গা উভতিল। পূৰ্বৰ দৰে আনন্দ-উছাহ নাথাকিলেও পৰম্পৰাগত নীতি-নিয়মৰ মাজৰে কোকৰাঝাৰতো সম্পন্ন কৰা হৈছে দেৱীৰ প্ৰতিমা বিসৰ্জন কাৰ্যসূচী। অশ্ৰুসিক্ত নয়নেৰে দুৰ্গতিনাশিনীক বিদায় দিলে ভক্তই।
কোকৰাঝাৰ জিলা প্ৰশাসনে বান্ধি দিয়া ক‘ভিড প্ৰট‘কলৰ নিয়ম অনুসৰি জিলাত প্ৰশাসনে চাৰিটা প্ৰতিমা বিসৰ্জনৰ স্থান হিচাপে নিৰ্ধাৰণ কৰিছে ৷ জিলাখনৰ গৌৰাং নৈ ঘাট,চম্পাৱতী ঘাট, ছেৰফাংগুৰি, সংকোচ ইত্যাদিত চৰকাৰে বান্ধি দিয়া নিয়ম অনুসাৰে অব্যাহত আছে বিসৰ্জন প্ৰক্ৰিয়া ৷ সমগ্ৰ জিলাত মুঠ ১৭৩ টা দুর্গাৰ প্ৰতিমাক এই ঠাইসুমহত বিসৰ্জন দিয়া হব, তাৰে কোকৰাঝাৰ চহৰৰ মুঠ ৫৮ টা প্ৰতিমাৰ বিসৰ্জন প্ৰক্ৰিয়া গৌৰাং নৈৰ ঘাটত চলি আছে ৷ চৰকাৰে বান্ধি দিয়া ক‘ভিড প্ৰট‘কলৰ মতে পূজা অনুষ্ঠিত হৈ যায় বুলি উল্লেখ কৰে জিলা উপায়ুক্ত ভাস্কৰ ফুকনে ৷
লগতে পঢ়ক: শিৱসাগৰৰ দিখৌ নদীত দেৱীৰ প্ৰতিমা বিসৰ্জন
