কোকৰাঝাৰ, 15 নৱেম্বৰ: শিশু দিৱস উদযাপন কৰি সমনীয়াৰ স'তে গৌৰাং নদীত গা ধুবলৈ গৈ সন্ধানহীন এজন ছাত্ৰ ৷ আজি এচডিআৰএফ বাহিনীৰ অভিযানত বেবীলেণ্ড হাইস্কুলৰ ষষ্ঠ শ্ৰেণীৰ ছাত্ৰ শান্তনু ৰাভা (12)ৰ নিথৰ দেহ উদ্ধাৰ হয় ৷
ছাত্ৰজন আছিল গোৱালপাৰা জিলা নিৱাসী চাৰুমোহন ৰাভা আৰু কোকিলা ৰাভাৰ সন্তান ৷ ছাত্ৰজনে কোকৰাঝাৰস্থিত ককায়েকৰ ঘৰত থাকি বেবীলেণ্ড হাইস্কুলত অধ্যয়ন কৰিছিল ৷
সমনীয়াৰ স'তে গা ধুই থকা অৱস্থাত ছাত্ৰজন পানীত ডুব গৈ সন্ধানহীন হৈ পৰে । সমনীয়াসকল ঘূৰি আহি সমগ্ৰ ঘটনা অভিভাৱকক অৱগত কৰে ৷ বিদ্যালয় কৰ্তৃপক্ষই ঘটনা সন্দৰ্ভত জিলা প্ৰশাসনক জনোৱাৰ পিচত কালিৰে পৰা এচডিআৰএফ বাহিনীৰ নিৰৱচ্ছিন্ন অভিযানত আজি পুৱা 10:10 বজাত ছাত্ৰজনৰ নিথৰ দেহ উদ্ধাৰ হয় ।
কোকৰাঝাৰত শোকাৱহ ঘটনা ৷ গৌৰাং নদীত উদ্ধাৰ ছাত্ৰৰ নিথৰ দেহ
মেধাৱী ছাত্ৰ শান্তনু ৰাভাৰ অকাল মৃত্যুত শোকৰ ছাঁ পৰিছে বেবীলেণ্ড হাইস্কুলত ৷
