গুৱাহাটী : মুখ্যমন্ত্ৰীয়ে দিল্লীত গৃহমন্ত্ৰীৰ পদবীটো ল'ব বিচাৰিছে নেকি ? এই সন্দেহ প্ৰকাশ কৰিছে বিৰোধী দলপতি দেৱব্ৰত শইকীয়াই ।
শেহতীয়াকৈ সাংসদ গৌৰৱ গগৈক লক্ষ্য কৰি মুখ্যমন্ত্ৰী ড৹ হিমন্ত বিশ্ব শৰ্মাই সামাজিক মাধ্যমযোগে কৰা মন্তব্য সন্দৰ্ভত প্ৰতিক্ৰিয়া প্ৰকাশ কৰি বিৰোধী দলপতিগৰাকীয়ে এইদৰে কয় ।
তেওঁ কয়, "গুৰুত্বপূৰ্ণ বিষয়ত থকা সাংসদ-বিধায়কসকল ওপৰত দিল্লীত গৃহ মন্ত্ৰালয়ৰ বিশেষ কোষৰ আই বি, ৰ’ আদিয়ে তীক্ষ্ণ দৃষ্টি ৰাখে । কিবা কৰিলে লগে লগে তদন্তৰ ব্যৱস্থা কৰে । এতিয়া অসমৰ মুখ্যমন্ত্ৰীৰ কি হৈছে মই নাজানো । মুখ্যমন্ত্ৰীয়ে দিল্লীত গৃহমন্ত্ৰীৰ পদবীটো ল'ব বিচাৰিছে নেকি যে গৃহমন্ত্ৰী অমিত শ্বাহ নিষ্কৰ্মা, অমিত শ্বাহে নিজৰ বিভাগটো চম্ভালিব পৰা নাই, সেই কাৰণে আমাৰ মুখ্যমন্ত্ৰীক গৃহমন্ত্ৰীৰ দায়িত্বটো লাগে । এই কথাটো অসমৰ কেবিনেটে সিদ্ধান্ত ল'ব নেকি, মই আচৰিত হৈছো ।"
লগতে পঢ়ক : এলিজাবেথ ক’লবাৰ্ণ গগৈ বিতৰ্ক; মুখ্যমন্ত্ৰী হিমন্ত বিশ্ব শৰ্মা, গৌৰৱ গগৈ ইত্যাদি লগতে পঢ়ক : মোৰ পত্নী যদি পাকিস্তানী এজেণ্ট, মই ভাৰতীয় এজেণ্ট: গৌৰৱ গগৈ |
তেওঁ লগতে কয়, "চৰকাৰে নৱেম্বৰ মাহতে জমা পুঁজি ঘূৰাই নিয়াৰ বাবে ধনৰ অভাৱত আজি মধ্যাহ্ন ভোজন দিব পৰা নাই । কলেজৰ শিক্ষকসকলে দৰমহা পোৱা নাই । পেঞ্চনাৰসকলে পেঞ্চন পোৱা নাই । সেইবিলাক কথা কেবিনেটত আলোচনা নকৰে । ভাৰতবৰ্ষৰ নিৰাপত্তাৰ বিষয়টোত কেন্দ্ৰীয় কেবিনেট কমিটী অন হোম এফেয়াৰ্ছ আছে । সেইসমূহে আলোচনা নকৰা বিষয়টো মুখ্যমন্ত্ৰীয়ে আলোচনা কৰিব বিচাৰিছে । ইয়াতকৈ হাস্যকৰ কথা আৰু নাই । আচলতে যিকোনো কথাৰে তেওঁলোকে কংগ্ৰেছ দলটোক ৰাইজৰ ওচৰত হেয় প্ৰতিপন্ন কৰিব বিচাৰে । এইবোৰ চক্ৰান্তৰ বাহিৰে একো নহয় ।"
চৰকাৰখনে পুনৰ ঋণ লোৱাৰ প্ৰসংগত তেওঁ কয়, "ক'বলৈ বেয়া যে ক'ৰ পইচা আনি ক'ত লগাইছে । মুখ্যমন্ত্ৰীয়ে জোৰা-টাপলি মাৰি চৰকাৰখন চলাই আছে । অসমৰ ৰাইজক ঋণগ্ৰস্ত কৰিছে । দুদিন আগতে উচ্চতম ন্যায়ালয়ে মানুহক নিষ্কৰ্মা কৰাটো ভাল কথা নহয় বুলি কৈছে । কেবিনেটত নিয়োগ সৃষ্টিৰ ওপৰত আলোচনা হ'ব লাগে ।"
