কোকৰাঝাৰ,৩ জুন: ৰাজ্যত অব্যাহত আছে কৰ'ণাৰ মৃত্যুৰ কিৰিলি । কৰ'ণাত আক্ৰান্ত হৈ কোকৰাঝাৰত পুনৰ মৃ্ত্যু এজনৰ । জিলাখনৰ এগৰাকী বিশিষ্ট সমাজকৰ্মী, ইতিহাসবিদ তথা বাঁওপন্থী নেতা বিপিন বৰ্মনৰ বুধবাৰে মৃত্যু হয় । কৰ'ণাত আক্ৰান্ত হৈ ৮০ বছৰ বয়সত মৃত্যু হয় কোকৰাঝাৰ চহৰৰ হাদানপাৰাৰ নিবাসী নেতাগৰাকীৰ ।
উল্লেখ্য যে, বিপিন বৰ্মন ক’ভিডত আক্ৰান্ত হোৱাত তেওঁক কোকৰাঝাৰ ৰূপনাথ ব্ৰহ্ম অসামৰিক চিকিৎসালয়ৰ ক’ভিড চেণ্টাৰত ভৰ্তি কৰোৱা হৈছিল । কেইবাদিনো ধৰি চিকিৎসা চলাৰ অন্তত কিছু পৰিমানে সুস্থ হোৱাত মঙলবাৰে বিয়লিৰ ভাগত তেওঁক চিকিৎসালয়ৰ পৰা অব্যাহতি দিয়া হৈছিল । কিন্তু বিপিন বৰ্মন পুনৰ অসুস্থ হৈ পৰাত ততাতৈয়াকৈ চিকিৎসালয়লৈ লৈ যোৱা হয় যদিও চিকিৎসকে তেওঁক মৃত ঘোষণা কৰে ।
কোকৰাঝাৰ জিলাৰ হালুৱাদলত জন্মগ্ৰহণ কৰা বিপিন বৰ্মন কৃষি বিভাগৰ অৱসৰপ্ৰাপ্ত কৰ্মচাৰী লগতে কোচ-ৰাজবংশী সন্মিলনীৰ মুখ্য উপদেষ্টা আৰু বিভিন্ন সমাজ সংগঠনৰ লগত জড়িত থকাৰ উপৰিও এগৰাকী ইতিহাসবিদ হিচাপে পৰিচিত আছিল । কোচ-ৰাজবংশী জনগোষ্ঠীৰ পুৰোধা নেতা বিপিন বৰ্মনৰ মৃত্যুত বিভিন্ন দল-সংগঠনে শোক প্ৰকাশ কৰিছে ।
ইফালে কোকৰাঝাৰ চহৰৰ হাদানপাৰাত বিগত ২০ দিনত ক’ভিডত আক্ৰান্ত হৈ তিনি গৰাকীকৈ লোকে প্ৰাণ হেৰুৱাইছে । জিলা প্ৰশাসনে ইতিমধ্যে হাদানপাৰা এলেকাক কণ্টেইনমেণ্ট জ’ন হিচাপে ঘোষণা কৰিছে ।
লগতে পঢ়ক:কন্টেইনমেণ্ট জ'নত থকা দৰিদ্ৰ পৰিয়ালক সহায় লুৰীণজ্যোতি গগৈৰ