কোকৰাঝাৰ, 2 ডিচেম্বৰঃ "বড়ো ভূমিত বসবাস কৰি থকা ইছলামধৰ্মী খিলঞ্জীয়া গৰিয়া মৰিয়া আৰু দেশীসকলক খিলঞ্জীয়া জনগোষ্ঠীয় মৰ্যদাৰে সামাজিক, অৰ্থনৈতিক, ৰাজনৈতিক আৰু ভূমিৰ অধিকাৰ সুনিশ্চিত হ'লে চৰকাৰ আৰু এনডিএফবিৰ মাজত হবলগীয়া সম্ভাব্য শান্তি চুক্তিৰ ক্ষেত্ৰত কোনো আপত্তি নাথাকে" । সদৌ অসম গৰিয়া মৰিয়া দেশী জাতীয় পৰিষদৰ সভাপতি হাফিজুল আহমেদে এই মন্তব্য কৰে ।
সোমবাৰে ৰঙিয়া গড়কপ্তানি আৱৰ্ত ভৱনত অনুষ্ঠিত বিটিএডিৰ অন্তৰ্গত জিলাসমূহৰ সভাত উপস্থিত থাকি কেন্দ্ৰীয় সভাপতি গৰাকীয়ে দাবী জনাই কয় যে বিটিচি প্ৰধান হাগ্ৰামা মহিলাৰীৰ উদ্যোগত চৰকাৰ আৰু এনডিএফবি (ধীৰেন গোট)ৰ মাজত হ'বলগীয়া শান্তি চুক্তিৰ ক্ষেত্ৰত অন্যান্য খিলঞ্জীয়া জনগোষ্ঠীৰ লগতে গৰিয়া মৰিয়া দেশীসকলৰ অধিকাৰ সুৰক্ষিত হ'ব লাগিব ।
সোমবাৰে বিটিএডিৰ অন্তৰ্গত পৰিষদৰ জিলা সমূহৰ এই সভাতে বিটিএডি অঞ্চলৰ গৰিয়া মৰিয়া দেশী সকলৰ সুৰক্ষাৰ স্বাৰ্থত শ্বেখ চেলিম পাটগিৰি আৰু আজিজুল হকক যুটীয়া মূখ্য সমন্বয়ক হিচাপে লৈ 'সদৌ অসম গৰিয়া-মৰিয়া-দেশী জাতীয় পৰিষদৰ' 21 জনীয়া বিটিএডি সমন্বয়ৰক্ষী সমিতিখন পুনৰ গঠন হয় । সভাত কেন্দ্ৰীয় চৰকাৰ আৰু এনডিএফবিৰ মাজত হবলগীয়া শান্তি চুক্তিৰ বাবে মধ্যস্থতাকাৰী বিষয়া এ.বি মাথুৰ, বিটিচি প্ৰধান হাগ্ৰামা মহিলাৰী আৰু এনডিএফবি (পি)ৰ সভাপতি ধীৰেণ বড়োক সাক্ষাৎ কৰি পৰিষদৰ দাবী সম্বলিত এক স্মাৰকপত্ৰ প্ৰদান কৰাৰ প্ৰস্তাৱ গ্ৰহণ কৰা হয় ৷ উক্ত সভাতে কেন্দ্ৰীয় সাংগঠনিক সম্পাদক ৰবিবুল হক আৰু গুৱাহাটী মহানগৰ সমিতিৰ সভাপতি ৰাজীৱ চৌধুৰী, ৰঙিয়া জিলা সভাপতি মোক্তাৰ হুছেইন আৰু সাধাৰণ সম্পাদক চামচূল হকৰ উপৰিও উপস্থিত থাকে বহু কেইগৰাকী বিষয়ববীয়া ।
