গুৱাহাটী : অসমীয়া চলচ্চিত্ৰপ্ৰেমীসকলৰ বাবে সু-খবৰ ৷ অহা ৭ৰ পৰা ৯ ফেব্ৰুৱাৰীলৈকে গুৱাহাটীত অনুষ্ঠিত হ’ব প্ৰথম গুৱাহাটী এছিয়ান চলচ্চিত্র মহোৎসৱ (GAFF) ৷ গুৱাহাটীৰ জ্যোতি চিত্ৰবনত অনুষ্ঠিত হ’বলগীয়া এই চলচ্চিত্ৰ মহোৎসৱত প্ৰদৰ্শন কৰা হ’ব কেইবাখনো নিৰ্বাচিত এছিয়ান ছবি ।
লগতে উক্ত অনুষ্ঠানতে সাংস্কৃতিক বিনিময় আৰু সৃষ্টিশীল বাৰ্তালাপৰ বাবে এক বিশেষ মঞ্চও প্ৰদান কৰা হ’ব । এছিয়াৰ শ্ৰেষ্ঠ ছবিসমূহক একত্ৰিত কৰাৰ লগতে উত্তৰ-পূব ভাৰতৰ অনন্য কণ্ঠৰ ওপৰত আলোকপাত কৰাৰ উদ্দেশ্যৰে অনুষ্ঠিত হ’ব এই চলচ্চিত্ৰ মহোৎসৱ ।
ইৰাণীয় চলচ্চিত্ৰ পৰিচালক বাবাক খাজেহপাচাৰ “In the Arms of the Tree” ৰ দ্বাৰা শুভাৰম্ভণি কৰা হ’ব এই চলচ্চিত্ৰ মহোৎসৱৰ । আনহাতে ইমতিয়াজ আলি, ৰীমা দাস, অনীৰ আৰু কবীৰ খানৰ ছবি “My Melbourne” ৰ দ্বাৰা অন্ত পৰিব এই চলচ্চিত্ৰ মহোৎসৱৰ । এই চলচ্চিত্ৰ মহোৎসৱত ইৰাণ, নেপাল, উজবেকিস্তান, কাজাখস্তান, হংকং, আজাৰবাইজান, বাংলাদেশ, ফিলিপাইনছ, শ্ৰীলংকা, তুৰ্কীকে ধৰি মুঠ দহখন দেশে অংশগ্ৰহণ কৰিব ।
উক্ত মহোৎসৱত দেশ-বিদেশৰ মুঠ ২০০ৰো অধিক চিনেমাৰ পৰা নিৰ্বাচন সমিতিৰ দ্বাৰা মুঠ ১৮ খন চিনেমা নিৰ্বাচিত কৰি উলিওৱা হৈছে । ইয়াৰে ১২খন এছিয়ান দেশসমূহৰ আৰু ৬খন বিভিন্ন ভাৰতীয় ভাষাৰ চিনেমা । ইয়াৰ লগতে উত্তৰ-পূব ভাৰতৰ চিনেমাৰ বাবে এক সুকীয়া প্ৰতিযোগিতামূলক শিতানৰ আয়োজন কৰা হৈছে, য’ত সৃষ্টিশীলতা, কাৰিকৰী উৎকৰ্ষতা, আৰু কাহিনীশৈলীৰ ওপৰত বিচাৰ কৰি শ্ৰেষ্ঠ ছবি, শ্ৰেষ্ঠ পৰিচালনা আৰু শ্ৰেষ্ঠ অভিনয়ৰ লগতে বিভিন্ন শাখাৰ কৃতিত্বক স্বীকৃতি প্ৰদান কৰা হ’ব ৷
বৃহস্পতিবাৰে গুৱাহাটী প্ৰেছ ক্লাবত এক সংবাদমেল সম্বোধন কৰি মহোৎসৱৰ পৰিচালক মনিতা বৰগোঁহায়ে মহোৎসৱ সন্দৰ্ভত বিভিন্ন কথা প্ৰকাশ কৰে । তেওঁ জনোৱা অনুসৰি তিনিদিনীয়া এই কাৰ্যসূচীত চলচ্চিত্ৰ নিৰ্মাতা আৰু বিশেষজ্ঞসকলৰ নেতৃত্বত আকৰ্ষণীয় আলোচনাপৰ্ব আৰু কৰ্মশালাও অনুষ্ঠিত কৰা হ’ব ।
এই মহোৎসৱত মুখ্য অতিথি হিচাপে থাকিব শ্ৰীলংকাৰ আন্তঃৰাষ্ট্ৰীয় খ্যাতিসম্পন্ন বিশিষ্ট চলচ্চিত্ৰ পৰিচালক প্ৰসন্ন ৱিথানাগে । লগতে অতিথি হিচাপে থাকিব কেইবাখনো দেশৰ চলচ্চিত্ৰ প্ৰতিনিধি । প্ৰথমবাৰৰ বাবে অনুষ্ঠিত হ’বলগীয়া এই মহোৎসৱত উপদেষ্টা হিচাপে আছে ৰাষ্ট্ৰীয় বঁটা বিজয়ী চলচ্চিত্ৰ সমালোচক তথা চলচ্চিত্ৰ নিৰ্মাতা উৎপল বৰপূজাৰী, ৰাষ্ট্ৰীয় বঁটা বিজয়ী চলচ্চিত্ৰ নিৰ্মাতা মঞ্জু বৰা আৰু বিশিষ্ট চলচ্চিত্ৰ সমালোচক, সাংবাদিক তথা সম্পাদক ডাল্টন ক্রিষ্টোফাৰৰ দৰে বহুকেইজন সন্মানীয় ব্যক্তি । লগতে মহোৎসৱৰ কিউৰেটৰ হিচাপে আছে চলচ্চিত্ৰ জগতৰ বিশিষ্ট ব্যক্তি শ্ৰীনিবাস সন্থানম ।
লগতে পঢ়ক : অসমত পোন প্ৰথমবাৰলৈ গুৱাহাটী এছিয়ান চলচ্চিত্ৰ মহোৎসৱ - Guwahati Asian Film Festival
