কোকৰাঝাৰ, 23 জুলাই : চাকৰি নিয়মীকৰণ নকৰাক লৈ ক্ষুদ্ধ হৈ পৰিছে সদৌ অসম প্ৰশিক্ষণপ্ৰাপ্ত গৃহৰক্ষী সন্থা ৷ চলিত বাজেট অধিৱেশনত গৃহৰক্ষী জোৱান (Home Guard) সকলৰ চাকৰি নিয়মীয়াকৰণৰ পদক্ষেপ গ্ৰহণ নকৰিলে ৰাজ্য চৰকাৰে ৷ যাৰ ফলত ৰাজ্যজুৰি অনিৰ্দিষ্টকালীন কৰ্মবিৰতিৰ হুংকাৰ দিছে সদৌ অসম প্ৰশিক্ষণপ্ৰাপ্ত গৃহৰক্ষী সন্থাই ৷
শুকুৰবাৰে সদৌ অসম প্ৰশিক্ষণপ্ৰাপ্ত গৃহৰক্ষী সন্থাৰ কোকৰাঝাৰ জিলা কমিটীয়ে সংবাদ মাধ্যমলৈ এক বিবৃতি প্ৰেৰণ কৰে ৷ বিবৃতিত উল্লেখ কৰা অনুসৰি, সদৌ অসম প্ৰশিক্ষণ প্ৰাপ্ত গৃহৰক্ষী সন্থাৰ ন্যাৰ্য দাবীসমূহক লৈ বিভাগীয় কৰ্তপক্ষ আৰু ৰাজ্য চৰকাৰৰ সৈতে আলাপ-আলোচনাৰ মাধ্যমেৰে সমাধান কৰিবলৈ চেষ্টা চলাই অহা হৈছে ৷ কিন্তু গৃহৰক্ষী সন্থাৰ ন্যাৰ্য দাবীসমূহৰ ক্ষেত্ৰত চৰকাৰে কোনো ধৰণৰ ইতিবাচক পদক্ষেপ গ্ৰহণ কৰা নাই ৷
বিগত বৰ্ষত অৰ্থাৎ ২০২০ চনৰ ১২ নৱেম্বৰত মুখ্যমন্ত্ৰী, ডিজিপিৰ লগতে মুখ্য সচিৱৰ সৈতে হোৱা আলোচনাকালত গৃহৰক্ষী সকলৰ সমস্যা সমাধান কৰা হ’ব বুলি আশ্বাস প্ৰদান কৰা হৈছিল ৷ কিন্তু সেই আশ্বাস আজিও কাৰ্যত পৰিণত নহ'ল ৷
ৰাজ্যখনৰ প্ৰায় ২৭ হেজাৰৰো অধিক প্ৰশিক্ষণপ্ৰাপ্ত গৃহৰক্ষী জোৱান আছে ৷ বৰ্তমান এই গৃহৰক্ষী জোৱান সকলৰ আৰ্থিক অৱস্থা অতি পুতৌলগা ৷ গৃহৰক্ষী জোৱানসকলে বিভিন্ন পৰ্যায়ত মাত্ৰ 9 হাজাৰ টকাৰ বিনিময়ত কৰ্তব্যত নিয়োজিত হৈ আহিছে ৷ গৃহৰক্ষী জোৱানসকলে দিনে-নিশাই কৰ্তব্য পালন কৰি থকা বিষয়টো সন্দৰ্ভত কেন্দ্ৰীয় তথা ৰাজ্য চৰকাৰৰ বিভাগীয় কৰ্তপক্ষৰ লগতে খোদ চৰকাৰো অৱগত ৷
ইয়াৰ সমান্তৰালভাৱে বিবৃতিত উল্লেখ কৰা অভিযোগ মতে, গাওঁবুঢ়া, টেট শিক্ষক, ১০৮ কৰ্মচাৰীকে আদি কৰি কেবাটাও অস্থায়ী বিভাগৰ কৰ্মচাৰী সকলক স্থায়ীভাৱে নিযুক্তি দিয়া হৈছে ৷ কিন্তু গৃহৰক্ষী জোৱান সকলক মাহী আইৰ দৃষ্টিৰে চাইছে চৰকাৰে ৷ সংবাদ মাধ্যমলৈ এই বিবৃতি প্ৰেৰণ কৰে সদৌ অসম প্ৰশিক্ষণ প্ৰাপ্ত গৃহৰক্ষী সন্থাৰ কোকৰাঝাৰ জিলা সমিতিৰ সভাপতি জীতেন চন্দ্ৰ বৰ্মন আৰু সাধাৰণ সম্পাদক বৰহান কাজীৰে ৷
লগতে পঢ়ক: গৃহৰক্ষী জোৱানৰ অনিৰ্দিষ্টকালীন কৰ্মবিৰতি
