কোকৰাঝাৰ,১৩ মে': কোকৰাঝাৰ জিলাত দ্ৰুতগতিত বৃদ্ধি পাবলৈ ধৰিছে কৰ’ণা আক্ৰান্তৰ সংখ্যা ৷ জিলাখনত বৃহস্পতিবাৰে পুনৰাই ৫৩ জনকৈ লোক কৰ’ণাত আক্ৰান্ত হোৱাত জিলাখনত মুঠ সক্ৰিয় কৰ’ণা আক্ৰান্তৰ সংখ্যা ৩৮৩ জনলৈ বৃদ্ধি পাইছে ।
এনে এক পৰিৱেশৰ মাজতে বৃহস্পতিবাৰে অসম চৰকাৰৰ মন্ত্ৰী উৰ্খাও গৌৰা ব্ৰহ্মৰ অধ্যক্ষতাত কোকৰাঝাৰ জিলা উপায়ুক্ত কাৰ্যালয়ৰ প্ৰেক্ষাগৃহত বিটিআৰৰ চাৰিওখন জিলাক সাঙুৰি ক’ভিড পৰিস্থিতি সম্পৰ্কীয় পৰ্যালোচনা বৈঠক অনুষ্ঠিত হয় । উক্ত বৈঠকত বিটিআৰৰ মুখ্য কাৰ্যবাহী প্ৰমোদ বড়ো, ৩০ নং কোকৰাঝাৰ পূৱ সমষ্টিৰ বিধায়ক লৰেঞ্চ ইছলাৰীৰ লগতে জিলাৰ শীৰ্ষ বিষয়াসকল উপস্থিত থাকে ।
বৈঠকৰ অন্তত মন্ত্ৰী উৰ্খাও গৌৰা ব্ৰহ্মই পৰ্যালোচনা বৈঠকত ক’ভিডৰ নীতি নিয়ম বলৱৎ সম্পৰ্কে আলোচনা কৰা হয় বুলি মন্তব্য কৰি কোকৰাঝাৰত অক্সিজেনৰ অভাৱ হোৱা নাই বুলিও মন্তব্য প্ৰকাশ কৰে । অৱশ্যে এম্বুলেঞ্চৰ কিছু সমস্যা হৈছে যদিও সেয়াও সোনকালে সমাধান হব বুলি সদৰী কৰি জনসাধাৰণক ক’ভিড সম্পৰ্কীয় নীতি নিয়ম মানি চলিবলৈ আহ্বান জনায় নেতাগৰাকীয়ে ।
ইপিনে পৰ্যালোচনা বৈঠকত উপস্থিত থকা বিটিআৰৰ মুখ্য কাৰ্যবাহী প্ৰমোদ বড়োৱে বাক্সা আৰু ওদালগুৰিৰ ক’ভিড পৰিস্থিতি কিছু উদ্বেগজনক বুলি মন্তব্য কৰিছে । দুখীয়া শ্ৰেণীৰ ৰাইজক বিনামুলীয়াভাৱে মাস্ক আৰু ছেনিটাইজাৰ যোগান ধৰাৰ চিন্তা-চৰ্চা চলি আছে বুলি মন্তব্য কৰি ক’ভিড পৰিস্থিতিৰ কথা সকলোৱে মনত ৰাখি সেইমতে সাৱধান হোৱাৰ আহ্বান জনাইছে প্ৰমোদ বড়োৱে ।
লগতে পঢ়ক: স্থবিৰ নহয় মাজুলীৰ উন্নতি: মুখ্যমন্ত্ৰী ডঃ হিমন্ত বিশ্ব শৰ্মা
