কোকৰাঝাৰ, ১২ জুন : দুই ভগ্নীৰ ৰহস্যজনক আত্মহত্যাৰ ঘটনাক লৈ কোকৰাঝাৰ জিলাত তীব্ৰ চাঞ্চল্যৰ সৃষ্টি হৈছে ৷ এই মৰ্মান্তিক ঘটনাটো সংঘটিত হৈছে কোকৰাঝাৰ জিলাৰ অতি ভিতৰুৱা গাঁও অভয়াকুটিত ৷ শুকুৰবাৰে বিয়লি অভয়াকুটি গাঁৱৰ দুই সম্পৰ্কীয় ভগ্নীৰ মৃতদেহ একেলগে এডাল গছতে চীপ লৈ থকা অৱস্থাত উদ্ধাৰ হৈছে । আত্মহত্যা কৰা দুয়োগৰাকীয়েই নাবালিকা বুলি জানিব পৰা গৈছে ৷
ইপিনে ঘটনাৰ খবৰ পোৱাৰ পাছত কোকৰাঝাৰ সদৰ আৰক্ষীৰ দল এটা ঘটনাস্থলীত উপস্থিত হৈ নাবালিকা দুগৰাকীৰ মৃতদেহ উদ্ধাৰ কৰি নিশা মৰণোত্তৰ পৰীক্ষাৰ বাবে কোকৰাঝাৰলৈ প্ৰেৰণ কৰে ৷ বৰ্তমানলৈকে এয়া আত্মহত্যা নে হত্যা সেয়া স্পষ্ট হোৱা নাই যদিও প্ৰাথমিক তদন্তত এয়া আত্মহত্যা বুলিয়ে সন্দেহ প্ৰকাশ কৰিছে আৰক্ষীয়ে ।
অৱশ্যে মৰণোত্তৰ পৰীক্ষাৰ পিছত হে আচল তথ্য ওলাই পৰিব বুলি আৰক্ষীয়ে প্ৰকাশ কৰে । আনফালে, পৰিয়ালৰ লোকে এয়া হত্যাকাণ্ড বুলি সন্দেহ কৰি হত্যাৰ পিছত মৃতদেহ দুটা গছত ওলোমাই থোৱা বুলি সন্দেহ প্ৰকাশ কৰিছে ৷
লগতে পঢ়ক: হোজাইত যুৱ কংগ্ৰেছৰ জিলা সম্পাদিকাৰ বিৰুদ্ধে গোচৰ ৰুজু
