কোকৰাঝাৰ, 15 ছেপ্তেম্বৰঃ বিটিআৰ চুক্তিৰ 6.3 দফা অতিশীঘ্ৰে কাৰ্যকৰী কৰাৰ দাবী নিখিল বড়ো ছাত্ৰ সন্থাৰ ৷ কৰ’ণা মহামাৰীৰ বাবে বিটিআৰ চুক্তি ৰূপায়ণৰ কাম-কাজ লেহেমীয়া হোৱাৰ অভিযোগ উত্থাপন হোৱাৰ সময়তেই এবছুৱেও চুক্তিৰ ৬.৩ দফা কাৰ্যকৰী কৰাৰ দাবী উত্থাপন কৰিছে ৷
সাংবাদিকৰ আগত মত বিনিময় কৰি নিখিল বড়ো ছাত্ৰ সন্থাৰ সভাপতি দ্বীপেন বড়োই কয়, বিটিআৰ চুক্তিৰ ৬.৩ দফা অনুসৰি বিটিআৰ অঞ্চলৰ শিক্ষানুষ্ঠানসমূহ প্ৰাদেশিকীকৰণ কৰা ৷ এই সন্দৰ্ভত ইতিমধ্যে বিগত 30 আগষ্টত শিক্ষামন্ত্ৰী হিমন্ত বিশ্ব শৰ্মাৰে উচ্চস্তৰীয় বিষয়াৰ উপস্থিতিত নিখিল বড়ো ছাত্ৰ সন্থাই আলোচনাত মিলিত হৈছিল ৷ আৰু এই সভাতেই এখন কমিটি গঠন কৰি বিটিআৰ অঞ্চলৰ অপ্ৰেদশিকীকৃত শিক্ষানুষ্ঠানসমূহ বিটিআৰ চুক্তিৰ আধাৰত প্ৰদেশীকৰণৰ ব্যৱস্থা হাতত লৈছিল ৷
ইয়াৰ মাজতেই দেশজুৰি নতুন শিক্ষানীতি 2020 প্ৰণয়ন কৰা হৈছে ৷ যাৰ ফলত দেশৰ শিক্ষা ব্যৱস্থা প্ৰৱল পৰিৱৰ্তনৰ দিশে আগবাঢ়িব ৷ কিন্তু এই শিক্ষানীতি বিটিআৰত কাৰ্যকৰী হোৱাৰ বাবে বিটিআৰ চুক্তিৰ অইন দফাসমূহৰ পূৰ্বে 6.3 নং দফা ৰূপায়ণ কৰাটো অতি প্ৰয়োজনীয় বুলি জনায় এবছুৰ সভাপতিগৰাকীয়ে ৷
লগতে পঢ়ক-মাস্ক নিপিন্ধা সকলৰ বিৰুদ্ধে কঠোৰ হৈছে ধুবুৰী আৰক্ষী
