কৰিমগঞ্জ,13 নৱেম্বৰ : কৰিমগঞ্জ জিলাৰ এৰেঙ্গাবাদত দীৰ্ঘ দিনৰ পৰা চলি আছে অবৈধ মদৰ বেহা ৷ যাৰ ফলত বিনষ্ট হৈছে অঞ্চলটোৰ পৰিৱেশ ৷ দিন দুপৰতে একাংশ সুৰাপায়ীয়ে অঞ্চলটোত কাজিয়া পেচাল কৰাৰ ফলত উঠি অহা প্ৰজন্মৰ ওপৰত এক বিৰূপ প্ৰভাৱ পৰিছে ৷ বাৰে বাৰে স্থানীয় সচেতন মহলে বিষয়টো আৰক্ষীক অৱগত কৰিছে যদিও কোনো ব্যৱস্থা গ্ৰহণ কৰা নাই ।
অঞ্চলটোৰ একাংশ মহিলাৰ অভিযোগ আৰক্ষী আৰু জন প্ৰতিনিধিৰ ছত্ৰ ছাঁয়াতে চলি আছে অবৈধ সুৰাৰ ৰমৰমীয়া বেহা ৷ কৰিমগঞ্জৰ এৰেঙ্গাবাদৰ মহিলা সকলে বদৰপুৰ আৰক্ষীৰ ওচৰত অভিযোগ দাখিল কৰিছিল যদিও কোনো গুৰুত্ব নিদিলে ৷ তাৰ পাছত বৃহস্পতিবাৰে অঞ্চলটোৰ একাংশ মহিলাই খঙত অগ্নিশৰ্মা হৈ ৰাজপথলৈ ওলাই আহে ৷ এক প্ৰতিবাদী কাৰ্যসূচী ৰূপায়ণ কৰি অবৈধ মদৰ ব্যৱসায়ী আৰু জন প্ৰতিনিধিক সকিয়নী প্ৰদান কৰে ৷
