কৰিমগঞ্জ, 19 আগষ্টঃ নিৰ্বাচনৰ পূৰ্বে ৰাজ্যত 24 ঘণ্টা বিদ্যুৎ যোগান দিয়াৰ প্ৰতিশ্ৰুতি দি দিছপুৰৰ গাদী দখল কৰাৰ পাচত চৰকাৰখনে দিয়া বিদ্যুৎ যোগানৰ উক্ত প্ৰতিশ্ৰুতি অসাৰ হৈছে কৰিমগঞ্জ জিলাত ৷ জিলাখনত অনিয়মীয়া বিদ্যুৎ যোগানৰ লগতে ৰাইজৰ পৰা অতিৰিক্ত বিদ্যুতৰ মাছুল সংগ্ৰহ কৰি থকাৰো অভিযোগ উত্থাপন হৈছে ৷ মাত্ৰ এটা বা দুটা বৈদ্যুতিক লাইট জ্বলোৱা একাংশ গ্ৰাহকৰ নামত তিনি-চাৰি হাজাৰ টকাৰ বিদ্যুতৰ বিল পঠিয়াই দিয়াৰো অভিযোগ উত্থাপন হৈছে নিলামবজাৰ বিদ্যুত পৰিষদৰ কার্যালয়ৰ বিৰুদ্ধে ৷
যাৰ ফলত এতিয়া অতিৰিক্ত বিদ্যুতৰ মাছুল পৰিশোধ আৰু অনিয়মীয়া বিদ্যুৎ যোগানৰ ফলত বিদ্যুৎ বিভাগৰ বিৰুদ্ধে ক্ষোভিত হৈ পৰিছে গ্ৰাহকসকল ৷ মঙলবাৰে দক্ষিণ কৰিমগঞ্জ যুব কংগ্রেছৰ সভাপতি মছৰুল হকৰ নেতৃত্বত ক্ষুদ্ধ যুৱ কংগ্রেছৰ সদস্যসকলে নিলামবজাৰ বিদ্যুৎ পৰিষদৰ কার্যালয়ৰ কৰ্মীসকলক বাহিৰত ৰাখি তলা লগাই দিয়ে ৷ অতিশীঘ্ৰে বিদ্যুৎ ব্যৱস্থা নিয়মীয়া কৰিবলৈ চৰকাৰক দাবী জনাইছে স্থানীয় ৰাইজৰ লগতে কংগ্ৰেছে ৷
লগতে পঢ়কঃ ভাঙি পেলোৱা হ'ল হাৰ্টথ্ৰ'ব জুবিন গাৰ্গৰ খাৰঘূলীস্থিত বাসগৃহ
