কৰিমগঞ্জ,৩০ মে': মুখ্যমন্ত্ৰী ড৹ হিমন্ত বিশ্ব শৰ্মাৰ নিৰ্দেশত ৰাজ্যজুৰি ড্ৰাগছৰ বিৰুদ্ধে সষ্টম হৈছে অসম আৰক্ষী । প্ৰতিদিনে ৰাজ্যৰ বিভিন্ন জিলাত চলিছে আৰক্ষীৰ ড্ৰাগছ বিৰোধী অভিযান । প্ৰতিখন জিলাৰ লগতে কৰিমগঞ্জ জিলাৰ আৰক্ষীয়েও বিভিন্ন প্ৰান্তত অভিযান অব্যাহত ৰাখিছে ।
শনিবাৰে নিশা জিলাখনৰ নিলামবজাৰ আৰক্ষীয়ে ড্ৰাগছৰ বিৰুদ্ধে অভিযান চলায় । নিলামবজাৰ আৰক্ষী চকীৰ অন্তৰ্গত ঊষাৰানী গাঁৱত গোপন সূত্ৰৰ পম খেদি ভাৰপ্ৰাপ্ত আৰক্ষী বিষয়া কমলেশ সিঙৰ নেতৃত্বত চলিছিল এই অভিযান ।
গাঁওখনৰ আব্দুছ ছবুৰৰ ঘৰত আৰক্ষীয়ে অভিযান চলাই বুজন পৰিমাণৰ ড্ৰাগছ উদ্ধাৰ কৰিবলৈ সক্ষম হয় । অভিযোগ অনুসৰি ঘৰৰ ভিতৰতে আব্দুছ ছবুৰে বিক্ৰীৰ বাবে ড্ৰাগছখিনি লুকুৱাই ৰাখিছিল । আৰক্ষীয়ে জব্দ কৰা ড্ৰাগছখিনিৰ মূল্য কেইবা লাখ টকা হ'ব বুলি অনুমান কৰা হৈছে । উল্লেখ্য যে, আব্দুছ ছবুৰৰ সমান্তৰালকৈ তেওঁৰ সহযোগী নাজিম উদ্দিন নামৰ আন এজন সৰবৰাহকাৰীকো আৰক্ষীয়ে আটক কৰিবলৈ সক্ষম হৈছে ।
