কৰিমগঞ্জ, 11 চেপ্তেম্বৰঃ সদৌ অসম চুতীয়া ছাত্ৰ সন্থাৰ চতুৰ্দশ বাৰ্ষিক প্ৰতিষ্ঠা দিৱস ৯ চেপ্টেম্বৰৰ পৰা তিনিদিনীয়া কাৰ্যসূচীৰে বৰাক উপত্যকাৰ কৰিমগঞ্জ জিলাৰ একমাত্ৰ অসমীয়া গাঁও আদাৰকোনাত অনুষ্ঠিত হৈছে। আদৰকোনা প্ৰাথমিক চিকিৎসালয়ৰ খেলপথাৰত (ৰত্নধ্বজ পাল ক্ষেত্ৰত) অনুষ্ঠিত হৈছে এই অনুষ্ঠান । প্ৰতিষ্ঠা দিৱসৰ কাৰ্যসূচীৰ লগত সংগতি ৰাখি জনগোষ্ঠীয় সাংস্কৃতিক সমাৰোহ আৰু শোভাযাত্ৰা উলিওৱা হয়। মূলত বৰাক আৰু ব্ৰহ্মপুত্ৰৰ মাজত বিভেদ আতৰাই একতাৰ এনাজৰীডাল মজবুত কৰাৰ উদ্দেশ্যে চুতীয়া ছাত্ৰ সন্থাই কৰিমগঞ্জত অনুষ্ঠিত কৰিছে এই অধিবেশন । ৰাজ্যৰ ১৯ টা জাতি জনগোষ্ঠীৰ কৃষ্টি,সংস্কৃতি ৰাজ্যবাসীৰ মাজত পৰিচয় কৰাই দিয়াৰ উদ্দেশ্যে জনগোষ্ঠীয় সমাৰোহৰ ও আয়োজন কৰিছে বুলি জানিবলৈ দিছে সদৌ অসম চুতীয়া ছাত্ৰ সন্থাৰ সাধাৰণ সম্পাদক মহেন বৰাই । প্ৰতিষ্ঠা দিৱসত ৰাজ্য কৃষি মন্ত্ৰী অতুল বৰা,পৰিমল শুক্লবৈদ্য,অসম সাহিত্য সভাৰ সভাপতি পৰমানন্দ ৰাজবংশী ধৰি,২০ টাকৈ ছাত্ৰ সংগঠনৰ প্ৰতিনিধিয়ে অংশগ্ৰহণ কৰাৰ লগতে সাংবাদিক,সাহিত্যিকে অংশ গ্ৰহণ কৰে । সভাত উপস্থিত থাকি কৃষি মন্ত্ৰী অতুল বৰাই চুতীয়া ছাত্ৰ সন্থাৰ অধিবেশন থলীৰ পৰাই বৰাক ব্ৰহ্মপুত্ৰৰ সমন্বয়,সম উন্নয়নৰ যাত্ৰা আৰম্ভ হ'ব বুলি মন্তব্য কৰে ।
উল্লেখ্য যে মানৰ আক্ৰমণত অতিষ্ঠ হৈ চুতীয়া লোকসকলে এসময়ত বৰাক উপত্যকাত আহি থিতাপি লৈছিলহি । বৰাকত ২২ খনকৈ অসমীয়া তথা চুতীয়া জনগোষ্ঠীয় লোকৰ গাঁও আছে। এই গাঁওসমূহ এতিয়াও বহু পিছপৰি আছে। বৰ্তমান চৰকাৰে ইয়াৰ উন্নয়নৰ ব্যৱস্থা গ্ৰহণ কৰিব বুলি আশ্বাস দিয়ে আবকাৰী মন্ত্ৰী পৰিমল শুক্লবৈদ্যই । সভাত অসম সাহিত্য সভাৰ সভাপতি পৰমানন্দ ৰাজবংশীয়ে স্মৃতি গ্ৰন্থ"আদৰকোনা "উন্মোচন কৰে । অনুষ্ঠানত ৩০টা জনজাতীয় সংগঠনৰ প্ৰতিনিধিয়ে অংশগ্ৰহণ কৰে ৷
