ডিফু, ১৮ মে': অসমৰ পাৰ্বত্য তথা সৰ্ববৃহৎ জিলা কাৰ্বি-আংলং স্বায়ত্বশাসিত পৰিষদৰ অন্তৰ্গত পৰ্যটন বিভাগটো হৈছে সকলোতকৈ ব্যৰ্থ পৰ্যটন বিভাগ । জিলাখনত বিভিন্ন প্ৰান্তত সৰু বৰ বহুতো জলপ্ৰপাত, প্ৰকৃতিৰ অপৰূপ সৌন্দৰ্য্য, নানান জীৱ-জন্তুৰ লগতে বিভিন্ন প্ৰজাতিৰ পক্ষীৰে পৰিপূৰ্ণ হৈ আছে যদিও একমাত্ৰ পৰ্যটন বিভাগটোৰ অৱহেলা, অদূৰদৰ্শিতাৰ বাবে পৰ্যটনৰ আকৰ্ষণীয় ক্ষেত্ৰ হিচাপে গঢ় দিয়াত সম্পূৰ্ণ ব্যৰ্থ হৈছে বিভাগটো । এই গুৰুতৰ অভিযোগ ইউনাইটেড ষ্টুডেন্টছ ইউনিয়ন অফ্ কাৰ্বি আংলং চমুকৈ উছুকাৰ ।
উল্লেখযোগ্য যে, কাৰ্বি আংলং জিলা আৰু পশ্চিম কাৰ্বি আংলং জিলাৰ অন্যতম শক্তিশালী ছাত্ৰ সংগঠন "উছুকাই" জন্ম লগ্নৰে পৰা জিলা দুখনৰ বিভিন্ন সমস্যা, পৰ্বতসম দুৰ্নীতিৰ বিৰুদ্ধে বলিষ্ঠ পদক্ষেপ গ্ৰহণ কৰি আহিছে । মঙলবাৰে ৰাতিপুৱাৰ ভাগত জিলা খনৰ লাংহিন নগৰস্থিত লাংহিন বহুমুখী সমবায় সমিতিৰ পৰিদৰ্শন বঙলাত এক সংবাদ মেল আয়োজন কৰি এই অভিযোগ উত্থাপন কৰে । কাৰ্বি আংলং স্বায়ত্বশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙকো বিভাগটোৰ ওপৰত এক তদন্ত চলাবলৈ আহ্বান জনায় সংগঠনটোৱে ।
তদুপৰি, বিভাগটোৰ ১৫ লাখ টকীয়া এখন আঁচনি ৰূপায়নৰ ক্ষেত্ৰত দেখা দিয়া ব্যতিক্ৰমৰ বাবে তদন্ত কৰিবলৈ ডকমকা আৰক্ষী থানাত ১০/২০২১ নম্বৰত এক গোচৰ ৰুজু কৰা বুলি সংবাদ মাধ্যমক জানিবলৈ দিয়ে "উছুকা"ৰ হৈ সভাপতি বিভীষণ টেৰণ আৰু সাধাৰণ সম্পাদক জিন্টু হাজৰিকাই । আনহাতে, অসমৰ নতুন মুখ্য মন্ত্ৰী ড৹ হিমন্ত বিশ্ব শৰ্মাকো পৰ্যটন বিভাগটোৰ ওপৰত বিহিত ব্যৱস্থা ল'বলৈ আহ্বান জনায় উছুকাৰ নেতাদ্বয়ে ।
লগতে পঢ়ক : বিধায়কৰ ৰূপত চাবুৱাত সৰ্বানন্দ সোণোৱাল
