ডিফু, 27 আগষ্ট : দেশজুৰি চলি থকা ক’ভিড(Covid) সংহাৰৰ মাজতে এইবাৰ কাৰ্বি আংলং জিলাৰ ডিফুৰ ‘পেশ্যনেট মাল্টি ফাৰ্ম’ত ধৰা পৰিছে আফ্ৰিকান ছোৱাইন ফিভাৰ(African Swine Fever) ৷ ইয়াৰ পাচতে নিধন কৰা হয় ফাৰ্মখনৰ সৰু-বৰ মুঠ 400 টাকৈ গাহৰিৰ ৷
গুৱাহাটীৰ পশুপালন বিভাগৰ(Animal Husbandry Department) এটা দলে গাহৰি নিধন কৰা বুলি জানিবলৈ দিয়ে ৷ কিছুদিন পূৰ্বে অজ্ঞাত কাৰণত ফাৰ্মখনত দুটাকৈ প্ৰাপ্তবয়স্ক গাহৰিৰ মৃত্যু হোৱাৰ পাচতে এই সন্দৰ্ভত জিলা পশুপালন বিভাগক খবৰ দিছিল ফাৰ্মখনৰ স্বত্ত্বাধিকাৰী ৰ’জমেৰী ৰংফাৰপীয়ে ৷
ইয়াৰ পাচতে বিভাগটোৰ এটা দলে গাহৰিৰ তেজৰ নমুনা সংগ্ৰহ কৰি পৰীক্ষা কৰে ৷ পৰীক্ষাৰ ফলাফলত ধৰা পৰে গাহৰি কেইটাৰ দেহত আফ্ৰিকান ছোৱাইন ফিভাৰৰ অৱস্থিতি ৷ তাৰ পাছতেই জনহিতাৰ্থে ফাৰ্মখনৰ স্বত্বাধিকাৰীয়ে বৃহৎ ত্যাগ স্বীকাৰ কৰে ৷ ফাৰ্মখনত থকা অন্য 400 টা গাহৰি নিধনৰ অনুমতি দিয়ে স্বত্ত্বাধিকাৰী ৰ’জমেৰী ৰংফাৰপীয়ে ৷
লগতে পঢ়ক: উত্তৰ পূৱত আফ্ৰিকান ছোৱাইন ফিভাৰৰ আতংক: 4149 গাহৰিৰ মৃত্যু
এই মাৰাত্মক ৰোগ ফাৰ্মৰ পৰা যাতে অন্য ঠাইলৈ বিয়পিব নোৱাৰে, সেই উদ্দেশ্যে গাহৰি কেইটা নিধন কৰিবলৈ অনুমতি প্ৰদান কৰা হয় ৷ ক’ভিড মহামাৰীৰ সমান্তৰালকৈ ৰাজ্যত চলিছে এতিয়া আফ্ৰিকান ছোৱাইন ফিভাৰৰ সংক্ৰমণ । ৰাজ্যত আফ্ৰিকান ছোৱাইন ফিভাৰত আক্ৰান্ত হৈ মৃত্যু হৈছে কেইবা হাজাৰ গাহৰিৰ ।
ঘৰচীয়া গাহৰিৰ পৰা যাতে এই ৰোগ বনৰীয়া গাহৰিলৈ সংক্ৰমিত নহয়, তাৰ বাবে ইতিমধ্যে বিভিন্ন পদক্ষেপ হাতত লৈছে বন বিভাগে(Forest Department) ৷ ৰাজ্যৰ শিৱসাগৰ, যোৰহাট, ডিব্ৰুগড়, বিশ্বনাথ আৰু লখিমপুৰ জিলাত প্ৰথমবাৰৰ বাবে গাহৰিৰ দেহত ধৰা পৰিছিল আফ্ৰিকান ছোৱাইন ফিভাৰ ৷
