ৰঙিয়া, 23 জানুৱাৰী : ৰঙিয়া ৰে'ল জংচনৰ সমীপত শুকুৰবাৰে নিশা সংঘটিত হয় এক অঘটন ৷ নামনিমুৱা ৰে'লৰ খুন্দাত মৃত্যুক সাৱটি ল'ব লগা হয় ৰাজস্থানৰ ৰাম নিবাস জাঠ নামৰ এজন যুৱকে ৷ জানিব পৰা মতে, ৰঙিয়াস্থিত এখন ব্যৱসায়িক প্ৰতিষ্ঠানত কৰ্মৰত ৰাম নিবাসে দোকান বন্ধ কৰি ঘৰলৈ বুলি গৈ থকা অৱস্থাতে এই শোকাৱহ ঘটনা সংঘটিত হয় ৷
ইপিনে, এই ঘটনাৰ পিছতে স্থানীয় ৰাইজে অভিযোগ কৰে যে, ৰে'ল আৰক্ষীৰ চকুৰ সন্মুখতে মৃতদেহৰ ওপৰেৰে কেইবাখনো ৰে'ল পাৰ হৈ যোৱাৰ পিছতো কোনো ধৰণৰ ব্যৱস্থা গ্ৰহণ নকৰিলে সংশ্লিষ্ট বিভাগে ৷ যাৰ পৰিপ্ৰেক্ষিতত চূৰ্ণ-বিচূৰ্ণ হৈ পৰে যুৱকজনৰ মৃতদেহ ৷ তদুপৰি ৰে'ল বিভাগৰ বিষয়া-কৰ্মচাৰীৰে তৰ্কত লিপ্ত হয় একাংশ সচেতন লোক ৷ অৱশেষত কেইবাঘণ্টাৰ অন্তত ৰে'ল আৰক্ষীয়ে মৃতদেহটো চমজি লয় ৷
লগতে পঢ়কঃ পুৰণিগুদামত দুৰ্ঘটনাত পতিত তীৰ্থযাত্ৰী বাহন : আহত কেইবাজনো
