ৰাজপথৰ পৰাই দুৰ্বৃত্তই হাইজেক কৰিলে চাহপাত ভৰ্তি ট্ৰাক

গোলাঘাট ৰোডৱেইজৰ অধীনত থকা জয় হিন্দ ৰোডৱেইজে গোলাঘাটৰ পৰা গুৱাহাটীলৈ এখন ট্ৰাকত সৰবৰাহ কৰিছিল প্ৰায় ৪৫০ বেগ চাহপাত । গুৱাহাটীৰ লাখটকীয়াৰ পি এম কৰ্পোৰেচনলৈ আনি থকা ২৪ লাখ টকা মূল্যৰ চাহপাত খিনি মহানগৰীত প্ৰবেশৰ পূৰ্বেই কৰা হয় হাইজেক ।

বাইহাটা,17ছেপ্তেম্বৰঃ অসম আৰক্ষীক কেৰেপ নকৰি ঘাইপথত দুৰ্বৃত্তৰ সন্ত্ৰাস ৷ ৰাষ্ট্ৰীয় ঘাইপথত অব্যাহত ইখনৰ পিছত আনখন ট্ৰাকৰ হাইজেক কৰাৰ ঘটনা ৷ এইবাৰ দুৰ্বৃত্তৰ শেন চকু পৰিল চাহপাত ভৰ্তি এখন ট্ৰাকত ৷

জানিব পৰা মতে, গোলাঘাট ৰোডৱেইজৰ অধীনত থকা জয় হিন্দ ৰোডৱেইজে গোলাঘাটৰ পৰা গুৱাহাটীলৈ ট্ৰাকখনত সৰবৰাহ কৰি আনিছিল প্ৰায় ৪৫০ বেগ চাহপাত । গুৱাহাটীৰ লাখটকীয়াৰ পি এম কৰ্পোৰেচনলৈ আনি থকা ২৪ লাখ টকা মূল্যৰ চাহপাতখিনি মহানগৰীত প্ৰবেশ কৰাৰ পূৰ্বেই কৰা হয় হাইজেক । চালকৰ হাত-ভৰি, মুখ বান্ধি হাইজেক কৰা ট্ৰাকখনৰ পৰা অধিক সংখ্যক চাহপাত লৈ উধাও হয় দুৰ্বৃত্তৰ দল । ইপিনে, এই ঘটনা সংঘটিত হোৱাৰ পিছতে কামৰূপৰ গৌৰীপুৰত এ এচ ২৫ বি চি ৯৩৭৩ নম্বৰৰ এই ট্ৰাকখন কেইবস্তামান চাহপাত সহ পৰিতক্ত অৱস্থাত উদ্ধাৰ কৰাৰ লগতে চালককো উদ্ধাৰ কৰে ট্ৰাকৰ ভিতৰৰ পৰা ৷

আনহাতে সমগ্ৰ ঘটনা সন্দৰ্ভত উত্তৰ গুৱাহাটীৰ গৌৰীপুৰ আৰক্ষীয়ে এক গোচৰ ৰুজু কৰি তদন্ত অব্যহত ৰখাৰ লগতে সোধাপোচাৰ বাবে আটক কৰিছে ট্ৰাক চালক আটোৱাৰ আলিক ৷

আৰক্ষীৰ চোকা পহৰাৰ পিছতো দুৰ্বৃত্তই কেনেদৰে ৰাজপথত ইখনৰ পিছত আনখন ট্ৰাক হাইজেক কৰিবলৈ সক্ষম হৈছে ? সেইয়া বৰ্তমান সময়ৰ এক ডাঙৰ প্ৰশ্ন !

লগতে পঢ়কঃ২১ ছেপ্টেম্বৰৰ পৰা আৰম্ভ হ’ব বিদ্যালয়ৰ পাঠদান