বাইহাটা, ৫ জুন: সঠিক শিক্ষাই একোজন ছাত্ৰক জীৱন যুঁজৰ সৈতে সংগ্ৰাম কৰি যাবলৈ বাট দেখুৱায়, মানৱ জীৱনৰ প্ৰকৃত অৰ্থ বিচাৰি পোৱাত সহায় কৰে । এই কথা প্ৰমাণ কৰিছে বাইহাটা চাৰিআলিৰ কেইগৰাকীমান ছাত্ৰই । ক'ভিড-১৯ মহামাৰীৰ বাবে চৰকাৰে জাৰি কৰা সান্ধ্য আইনে এতিয়া বাৰুকৈয়ে প্ৰভাৱ পেলাইছে দৰিদ্ৰ লোকসকলৰ জীৱনত ।
দিন হাজিৰা কৰি পৰিয়াল পোহপাল দিয়া লোকসকলে কামৰ অভাৱত ঘৰতে থাকিবলগীয়া হৈছে । ফলত উপাৰ্জন পথ বন্ধ হৈ পৰিছে । এই লোকসকলক সংকটৰ সময়ত কিছু সকাহ দিয়াৰ বাবে আগবাঢ়ি আহিছে কেইগৰাকীমান ছাত্ৰ ।
দৰিদ্ৰ লোকসকলে যাতে লঘোণে থাকিবলগীয়া নহয়, তাৰ বাবে চাউল, দাইল, চেনী, বিস্কুট আদি যোগান ধৰিছে ছাত্ৰকেইজনে । লগতে ক'ভিড-১৯ৰ ভয়ৱহতা সন্দৰ্ভত সজাগতা সৃষ্টিৰ উদ্দেশ্যেৰে মাস্ক আৰু ছেনিটাইজাৰো বিতৰণ কৰিছে । কোনো ধৰণৰ উপাৰ্জন নথকা এই ছাত্ৰকেইজনে পিতৃ-মাতৃয়ে হাত খৰচৰ বাবে দিয়া পইচা জমা কৰি ১৫টা দুখীয়া পৰিয়ালক এই সামগ্ৰীসমূহ যোগান ধৰে । আনহাতে, এই ছাত্ৰ কেইজনে অন্য ব্যক্তি তথা অনুষ্ঠানসমূহকো দৰিদ্ৰ পৰিয়ালসমূহক সহায়ৰ হাত আগবঢ়াবলৈ আহ্বান জনায় ।
লগতে পঢ়ক:বাইহাটাত নিচাজাতীয় সামগ্ৰীসহ আটক দুজন
