বকো, 19 আগষ্ট: বুধবাৰে বকোৰ ৰায়পাৰাত সংঘটিত হয় এক পথ দুৰ্ঘটনা ৷ ছমৰীয়াৰ পৰা বকো অভিমুখে আহি থকা এখন মাৰুতি এল্ট' গাড়ীয়ে মহতিয়াই এখন স্কুটি ৷ ঘটনা সংঘটিত কৰিয়েই ঘটনাস্থলীৰ পৰা পলায়ন কৰে তীব্ৰবেগী বাহন খনে ৷ কিন্তু তীব্ৰবেগী বাহনখনে পলায়ন কৰে যদিও, নিয়ন্ত্ৰণ হেৰুৱাই পথৰ দাঁতিত থকা এটা খাৱৈত পৰে গৈ ৷ বাহনখনে খাৱৈটোত মাছ মাৰি থকা এগৰাকী মহিলাকো খুন্দিয়ায় গুৰুতৰভাৱে আহত কৰে ৷
আনহাতে গাড়ীখনে মহতিয়াওৱাৰ ফলত গুৰুতৰভাৱে আঘাতপ্ৰাপ্ত হয় স্কুটি খনৰ আৰোহী দুলাল কৈৱৰ্ত আৰু ভৱেন্দ্ৰ কৈৱৰ্ত নামৰ দুগৰাকী যুৱক ৷ স্থানীয় লোকৰ সহযোগত মাৰুতি এল্ট' খনৰ চালক সহিতে মহিলা গৰাকীক আৰু যুৱকদ্বয়ক বকো প্ৰাথমিক স্বাস্থ্য কেন্দ্ৰত ভৰ্তি কৰোৱা হয় ৷ পৰৱৰ্তী সময়ত এল্ট' খনৰ চালক আৰু মহিলা গৰাকীক উন্নত চিকিৎসাৰ বাবে গুৱাহাটী চিকিৎসা মহাবিদ্যালয়ৰ চিকিৎসালয়লৈ প্ৰেৰণ কৰা হয় ৷
লগতে পঢ়ক: ভুৱা আৰক্ষীৰ দলে লুটিলে নগদ ধনসহ আ-অলংকাৰ
