ৰঙিয়া, 26 চেপ্তেম্বৰ: মৌ-মাখিৰ শব্দক ভয় কৰে হাতীয়ে। এই কথাষাৰ ওপৰত ভিত্তি কৰিয়েই ২০১৭ চনত তদানীন্তন ডি আৰ এম ৰবিলেশ কুমাৰে এক অভিনৱ পদক্ষেপ গ্ৰহণ কৰে হাতী আৰু ৰে'লৰ দুৰ্ঘটনা ৰোধ কৰাৰ বাবে। ''এলিফেণ্ট কৰিড'ৰ'' দি ৰেল পাৰ হৈ যোৱা সময়ত ৰে'ল পথত মাইকৰে মৌ মাখিৰ শব্দ বজাবলৈ আৰম্ভ কৰে ৷
ইয়াৰ পিছত গোটেই অসমৰ 21 টা এলিফেণ্ট কৰিড'ৰত এই পদ্ধতিৰে হাতী আৰু ৰে'লৰ দুৰ্ঘটনা ৰোধৰ বাবে চেষ্টা চলোৱা হৈছিল। এই অভিনৱ পদ্ধতিৰ সুফল স্বৰূপে যোৱা দুবছৰত এই 21 এটা অঞ্চলত এটাও হাতী আৰু ৰে'ল দুৰ্ঘটনা সংঘটিত হোৱা নাই৷ যাৰ বাবে ভাৰতীয় ৰে'ল বোৰ্ডে এই অভিনৱ পদক্ষেপক 2018-19 বৰ্ষৰ অভিনৱ উৎকৃষ্ট পৰামৰ্শ আঁচনি পুৰস্কাৰৰ বাবে মনোনীত কৰিছে৷
মাত্ৰ 2000 টকা ব্যয় হোৱা এই পদ্ধতিটোৰ দ্বাৰা এটা মাইকৰ জৰিয়তে 600 মিটাৰ দুৰত্ব পৰ্যন্ত শব্দ প্ৰেৰণ কৰা হয়৷ অতি কম খৰচতে ৰে'লেৰে হোৱা হাতীৰ দুৰ্ঘটনা ৰোধ কৰিবৰ
বাবে ৰঙিয়া সংমণ্ডলে গ্ৰহণ কৰা এই অভিনৱ পদক্ষেপক প্ৰসংশা কৰিছে ভাৰতীয় ৰে'ল বিভাগে৷
