ৰঙিয়া,25জুলাইঃ বিদ্যুৎ বিভাগৰ কৰ্মচাৰীয়ে দিছে নতুন কিটিপ ৷ ৰঙিয়াৰ এজন লোকৰ ঘৰত বিজুলী সংযোগৰ বাবে বহু কাকুতি মিনতিৰ অন্তত হাকুটি লগাই বিদ্যুৎ সংযোগ কৰিবলৈ উচতাই খোদ বিভাগীয় কৰ্মচাৰীয়ে ৷ উল্লেখ্য যে ৰঙিয়াৰ হালিকুছিৰ মোহন কলিতা নামৰ লোকজনৰ এমাহ পূৰ্বে তেওঁৰ ঘৰলৈ বিদ্যুতৰ তাঁৰ কঢ়িওৱা খুঁটাটো ওভালি পৰাত বিভাগীয় কৰ্মচাৰীক জনায় যদিও বহু কাকুতি মিনতিৰ অন্তত বিভাগীয় কৰ্মচাৰী দুদিন আগত তেওঁৰ গৃহত উপস্থিত হয় ৷ ইপিনে মোহন কলিতাৰ ঘৰৰ বিদ্যুৎ সংযোগ কৰ্তন কৰে আৰু কলিতাক সমস্যা সমাধানৰ এক অদ্ভুত উপায় দিয়ে । তেওঁলোকৰ কাষতে থকা আন এটা খুঁটাৰ পৰা হাকুটি লগাই মোহন কলিতাক বিদ্যুৎ চোৰ কৰিবলৈ উচতাই বিভাগৰ কৰ্মচাৰীয়ে।
আনহাতে মিটাৰ নোহোৱাকৈ বিল দিয়া, খুঁটাৰ পৰা বিপদজনক ভাৱে ওলমি থকা তাঁৰ ঠিক নকৰাকে আদি কৰি বিভিন্ন কাৰণত অতিষ্ঠ হৈ গাওঁবাসীয়ে বৃহস্পতিবাৰে শক্তি বিভাগৰ বিৰুদ্ধে ক্ষোভ উজাৰে ৷
