ৰঙিয়া, ১৬ আগষ্ট : সোমবাৰৰ পৰা অনিৰ্দিষ্টকালীনভাৱে অসহযোগ আৰু ধৰ্ণা কাৰ্যসূচী ৰূপায়ণ কৰিছে সদৌ অসম জনস্বাস্থ্য কাৰিকৰী অস্থায়ী কৰ্মচাৰী সন্থাই । সোমবাৰৰ পৰা বন্ধ হৈ পৰিছে ব্ৰহ্মপুত্ৰৰ উত্তৰ পাৰৰ পানী যোগান । চাকৰি নিয়মীয়াকৰণ আৰু দৰমহা আদায় দিয়াৰ দাবীত সোমবাৰৰ পৰা প্ৰতিবাদী কাৰ্যসূচী ৰূপায়ণ কৰিছে অস্থায়ী কৰ্মচাৰী সন্থাই । সমগ্ৰ অসমৰ মুঠ ১২টা সংমণ্ডলৰ ভিতৰত সোমবাৰে ৮ টা সংমণ্ডলত ধৰ্ণা কাৰ্যসূচী গ্ৰহণ কৰে পাম্প অপাৰেটৰসকলে ।
এই অসহযোগ কাৰ্যসূচীৰ সময়চোৱাত পাম্প অপাৰেটৰসকলে ৰাজ্যৰ বিভিন্ন প্ৰান্তত থকা জনস্বাস্থ্য কাৰিকৰী বিভাগৰ পানী যোগান আঁচনিসমূহৰ পানী যোগানৰ কাম কৰাৰ পৰা বিৰত আছে । লগতে পানী যোগান আঁচনিসমূহত চলি থকা জল জীৱন মিছনৰ কাম কৰাৰ পৰাও বিৰত থাকি মিছনৰ কাম-কাজ স্তব্ধ কৰাৰ হুংকাৰ দিয়ে । এই ক্ষেত্ৰত যিকোনো অপ্ৰীতিকৰ পৰিস্থিতি সৃষ্টি হ'লে চৰকাৰ দায়ী হ'ব বুলি সকীয়াই দিয়ে পাম্প অপাৰেটৰসকলে । উল্লেখ্য যে, প্ৰায় এটা দশকতকৈও অধিক কাল পাম্প অপাৰেটৰসকলে বিনা বেতনেৰে কাম কৰি আহিছে ।
চৰকাৰে প্ৰতাৰণা কৰাৰ অভিযোগ উত্থাপন কৰিছে পাম্প অপাৰেটৰসকলে । অনাগত দিনত তেওঁলোকে আন্দোলন তীব্ৰতৰ কৰি তুলিলে তাৰ বাবে চৰকাৰ জগৰীয়া হ'ব বুলি সকীয়াই দিছে । উল্লেখ্য যে, এইসকল কৰ্মচাৰীৰ অধিক সংখ্যকেই নিয়মীয়া চাকৰিৰ আশাত নিজৰ ম্যাদী মাটি পানী যোগান আঁচনি নিৰ্মাণ কৰিবলৈ চৰকাৰক দান কৰিছিল ।
কিন্তু ইমান বছৰৰ পিছতো তেওঁলোকৰ চাকৰি নিয়মীয়াকৰণ নহ'ল । ইয়াৰ উপৰিও এইসকল কৰ্মচাৰীসকলে বছৰ বছৰ ধৰি বেতনো লাভ কৰা নাই । ২০১৩-২০১৪ বৰ্ষত কেতবোৰ আঁচনিত কমিটী গঠন কৰি ছমাহৰ বাবে পাঁচ হাজাৰ টকাকৈ দিয়া হৈছিল যদিও ছমাহৰ পিছত সেইখিনি মাননি দিয়াও বন্ধ কৰি দিয়া হয় ।
মানৱীয়তাৰ খাতিৰত ইমান দিনে কাম কৰি অহা এইসকল কৰ্মচাৰীয়ে এতিয়া উচিত প্ৰাপ্যৰ দাবী জনাইছে । কিয়নো, আন চাকৰিৰ বাবে আবেদন কৰিবলৈ নিৰ্ধাৰিত বয়সৰ দেওনা পাৰ কৰিছে অধিকাংশ লোকে । চৰকাৰে শীঘ্ৰে তেওঁলোকৰ সমস্যা সমাধান নকৰিলে অনাগত দিনত যিকোনো পৰিস্থিতিৰ উদ্ভৱ হ’লে চৰকাৰ দায়ী হ'ব বুলি সদৌ অসম জনস্বাস্থ্য কাৰিকৰী অস্থায়ী কৰ্মচাৰী সন্থাই সকীয়নি দিয়ে ।
লগতে পঢ়ক : পদুমপুখুৰী ডাকঘৰত নুৰিল ৰাষ্ট্ৰীয় পতাকা
