ছয়গাঁও ২০ ডিচেম্বৰ : CAA আন্দোলনৰ প্ৰথম ছহিদ দীপাঞ্জল দাসৰ বৃহস্পতিবাৰে তেওঁৰ জন্মস্থান দলৈপাৰা গাঁৱত ৰাজহুৱা আদ্যশ্ৰাদ্ধৰ লগতে স্মৃতিচাৰণ সভা অনুষ্ঠিত হয় ৷ হেজাৰ-হেজাৰ লোকে অংশগ্ৰহণ কৰা এই অনুষ্ঠানত দীপাঞ্জল দাসৰ সমাধিস্থলীত শ্ৰদ্ধাঞ্জলী জনোৱাৰ লগতে দিনটো নাম প্ৰসংগ, ভাগৱত পাঠ আদিৰে মুখৰিত হৈ থাকে ৷ আনহাতে দলৈপাৰা গোসাঁইঘৰ প্ৰাংগনত অনুষ্ঠিত স্মৃতিচাৰণ সভাত বহুসংখ্যক সংগঠনৰ বিশিষ্ট ব্যক্তিৰ লগতে শিল্পী সাহিত্যিকে অংশগ্ৰহণ কৰে ৷
অনুষ্ঠানত জাতীয় ছহিদ পৰিয়াল সমন্বয়ৰক্ষী পৰিষদৰ সভাপতি ৰাজেন ডেকা আৰু সাধাৰণ সম্পাদক চন্দ্ৰকান্ত তালুকদাৰৰ নেতৃত্বত অহা এটি প্ৰতিনিধি দলে দীপাঞ্জল দাসৰ পৰিয়ালৰ হাতত শ্ৰদ্ধাঞ্জলি পত্ৰ অৰ্পণ কৰে ৷ একেদৰে অনুষ্ঠানত ছয়গাঁও সমষ্টিৰ বিধায়ক ৰেকিবুদ্দিন আহমেদে অংগ্ৰহণ কৰি ’কা’ৰ বিৰুদ্ধে চলিবলগীয়া দীঘলীয়া সংগ্ৰামত ছয়গাঁওবাসীক হিংসাৰ সলনি শান্তিপূৰ্ণভাৱে অংগ্ৰহণ কৰিবলৈ আহ্বান জনায় ৷ তেওঁ কমলা কলিতাহঁতৰ দৰে অগপ নেতা সকলক জোতাৰ মালা আঁৰি দিব লাগে বুলিও কয় ৷ তেওঁ দীপাঞ্জলৰ পিতৃৰ হাতত ব্যক্তিগতভাৱে ৫১ হেজাৰ টকা সাহাৰ্য প্ৰদান কৰে ৷ আনহাতে সমাধিস্থলীত ছহিদ বেদী নিৰ্মাণৰ বাবে বিধায়ক উন্নয়ন পুঁজিৰ পৰা ২ লাখ টকা অনুদান ঘোষণা কৰাৰ লগতে দীপাঞ্জল দাসৰ ঘৰলৈ যোৱা পথটো নিৰ্মাণৰ বাবে ৫ লাখ টকা আবণ্টনৰ ব্যৱস্থা কৰিব বুলি ৰাইজক জানিবলৈ দিয়ে ৷
উক্ত অনুষ্ঠানত অসম সাহিত্য সভাৰ সভাপতি ড৹ পৰমানন্দ ৰাজবংশী উপস্থিত হৈ প্ৰথমে দীপাঞ্জল দাসৰ সমাধিস্থলীত শ্ৰদ্ধাঞ্জলি জ্ঞাপন কৰে৷ ইয়াৰ পাচতেই তেওঁ স্মৃতিচাৰণ সভাত উপস্থিত হৈ চমু ভাষণ দিয়ে ৷ ভাষণত তেওঁ অসম সাহিত্য সভা সদায় ভাষাৰ স্বাৰ্থত আৰু CAA ৰ বিপক্ষত থকা বুলি কৈ এই ক্ষেত্ৰত সকলো ৰাইজকে এই আইনৰ বিৰুদ্ধে ওলাই আহিবলৈ আহ্বান জনাই ৷
