ৰঙিয়া, 12 মাৰ্চ : দ্বিতীয় পৰ্যায়ৰ মনোনয়নৰ অন্তিম দিনা ৰঙিয়া বিধানসভা সমষ্টিত আজি 6 গৰাকী প্ৰাৰ্থীয়ে মনোনয়ন দাখিল কৰে । বিশাল সমদলেৰে প্ৰাৰ্থীসকলে শক্তি প্ৰদৰ্শন কৰি ৰঙিয়াৰ জিলা নিৰ্বাচন বিষয়াৰ কাৰ্যালয়ত দাখিল কৰে মনোনয়ন ।
প্ৰথমে ৰাইজৰ দলৰ প্ৰাৰ্থী হৰেশ্বৰ বৰ্মনৰ শতাধিক সমৰ্থক ৰঙিয়াৰ হাইৱে' চকত সমবেত হয় । দলটোৰ কৰ্মীসকলে প্ৰাৰ্থীগৰাকীৰ সমৰ্থনত হাতে হাতে বেনাৰ-পোষ্টাৰ লৈ সমদল কৰি মহকুমাধিপতি কাৰ্যালয়লৈ যায় । হৰেশ্বৰ বৰ্মনে বিজেপি আৰু আৰএছএছৰ দৰে সাম্প্ৰদায়িক শক্তিৰ বিৰুদ্ধে এইবাৰ ৰাইজে ভোট দিব বুলি মন্তব্য প্ৰকাশ কৰে ।
আনহাতে অসম জাতীয় পৰিষদৰ প্ৰাৰ্থী ডাঃ বাবুল চহৰীয়াই শতাধিক সমৰ্থকক লগত লৈ আজি মনোনয়ন দাখিল কৰে । জাতীয় পৰিষদৰ প্ৰাৰ্থীগৰাকীয়ে বান আৰু গৰাখহনীয়া সমস্যাৰ ইছ্যুলৈ এইবাৰ নিৰ্বাচনত অৱতীৰ্ণ হোৱা বুলি উল্লেখ কৰে । একেদৰে ভোটাৰ্ছ পাৰ্টি ইন্টাৰনেছনেলৰ পবিত্ৰ বড়ো, নিৰ্দলীয় প্ৰাৰ্থী জয়ন্ত কলিতাই অন্তিম দিনটোত মনোনয়ন দাখিল কৰে ৷
লগতে পঢ়ক:7 সমষ্টিৰ পৰিৱৰ্তে বিটিচিৰ বাহিৰে ভিতৰে 9 টা সমষ্টিত প্ৰাৰ্থীত্ব দিব ইউপিপিএলে
