কামৰূপ,5 জানুৱাৰী: প্ৰবীণ অভিনেত্ৰী মীৰা বিশ্বাস আৰু নাই ৷ বিষ্ণু ৰাভা,ফণী শৰ্মাৰ সৈতে অভিনয় কৰা অভিনেত্ৰী মীৰা বিশ্বাসে মঙলবাৰে বিয়লি হৃদৰোগত আক্ৰান্ত হৈ ৭৮ বছৰ বয়সত গুৱাহাটীৰ ডাউন টাউন হাস্পতালত ইহলীলা সম্বৰণ কৰে ৷ নাট্যজগতৰ জৰিয়তে বোলছবি জগতত খোজ পেলোৱা নলবাৰী জিলাৰ প্ৰথমগৰাকী অভিনেত্ৰী মীৰা বিশ্বাসে সৰাপাত,নাৱিক,ৰত্নাকৰ আদি ছবিত অভিনয় কৰি দৰ্শকৰ মন জয় কৰিবলৈ সক্ষম হৈছিল ৷ নাট্যজগতৰ পৰিচিত মীৰা বিশ্বাসে দীপা মেহতাৰ ৱাটাৰ ছবিখনতো অভিনয় কৰিছিল ৷
বাণ ৰঙ্গমঞ্চৰ পৰা কুমাৰ ভাস্কৰ নাট্য মন্দিৰলৈ মঞ্চ কপোৱা অভিনেত্ৰী গৰাকী খ্যাতিমান অভিনেত্ৰী সীমা বিশ্বাসৰ মাতৃ ৷ অভিনেত্ৰী গৰাকীয়ে মৃত্যুৰ পূৰ্বে নিজৰ দেহ আৰু চকু দান কৰি যায় ৷ প্ৰবীণ অভিনেত্ৰী মীৰা বিশ্বাসৰ মৃত্যুত বিভিন্ন দল-সংগঠনে গভীৰ শোকপ্ৰকাশ কৰে ৷ বুধবাৰে ৰাতিপুৱা অভিনেত্ৰী গৰাকীৰ ছয়মাইলস্থিত বাসভৱনত শেষ শ্ৰদ্ধাঞ্জলি জ্ঞাপন কৰি শেষকৃত্য সম্পন্ন কৰা হ'ব ৷
লগতে পঢ়ক: এম জি এনৰেগা আঁচনিৰ অধীনত 6 লাখ লোকলৈ জবকাৰ্ড বিতৰণ
