ৰঙিয়া, ৭ ছেপ্টেম্বৰ: কিমান আৰু পথ মেৰামতিৰ বাবে জন প্ৰতিনিধিক আহ্বান জনাব । ৰাইজৰ সমস্যাৰ প্ৰতি ভ্ৰূক্ষেপ নাই চৰকাৰ তথা জন প্ৰতিনিধিৰ । সেয়েহে, পথ নিৰ্মাণৰ দাবীত প্ৰতিবাদ সাব্যস্ত কৰিলে স্থানীয় ৰাইজে । বিজেপিৰ ৰাজ্যিক সভাপতি ভৱেশ কলিতাৰ গৃহ সমষ্টিতে পথৰ জৰাজীৰ্ণ অৱস্থা ।
ৰঙিয়াৰ কানিকুছি আৰু বালিসত্ৰ সংযোগী অতি গুৰুত্বপূৰ্ণ পথটোৰ বিধ্বস্ত অৱস্থাই হাৰাশাস্তি ভোগাইছে স্থানীয় ৰাইজক । যাতায়াতৰ নামত ৰাইজে যমৰ যাতনা ভূগিবলগীয়া হৈছে । উল্লেখ্য যে, নিৰ্বাচনৰ পূৰ্বে ৰঙিয়াত শতাধিক পথৰ আধাৰশিলা স্থাপন কৰিছিল সমষ্টিটোৰ বৰ্তমানৰ বিধায়ক তথা বিজেপিৰ ৰাজ্যিক সভাপতি ভৱেশ কলিতাই । কিন্তু এই পৰ্যন্ত পথটোৰ নিৰ্মাণৰ বাবে জন প্ৰতিনিধিগৰাকীয়ে কোনো ধৰণৰ পদক্ষেপ গ্ৰহণ নকৰাৰ অভিযোগ উত্থাপন কৰিছে স্থানীয় ৰাইজে ।
এই বিষয়ে ৰাইজে কেইবাবাৰো বিধায়ক ভৱেশ কলিতাক অৱগত কৰাৰ স্বত্বেও পথটো মেৰামতি নহ'ল । চৰকাৰ তথা জন প্ৰতিনিধিৰ অৱহেলাত বছৰ বছৰ ধৰি মেৰামতি নোহোৱাকৈ পৰি ৰৈছে অঞ্চলটোৰ এই গুৰুত্বপূৰ্ণ এই পথছোৱা । ফলত ছাত্র-ছাত্ৰীসকলৰ লগতে বৃদ্ধ আৰু মহিলা সকলো এই পথটোৰেই অহা-যোৱা কৰিবলগীয়া হৈছে ।
এজাক বৰষুণতে বোকা-পানীৰে ভৰি পৰে পথটো । পথটোত থকা প্ৰকাণ্ড গাঁতবোৰো এজাক বৰষুণতে পুখুৰী সদৃশ হৈ পৰে । ইতিমধ্যে পথটোত বহু দুৰ্ঘটনা সংঘটিত হৈছে । আনফালে, জৰুৰীকালীন সময়ত জৰাজীৰ্ণ পথটোৰ বাবে অঞ্চলটোলৈ এম্বুলেঞ্চ অথবা অগ্নি নিৰ্বাপক বাহিনীৰ গাড়ী যাব নোৱৰাত আন এক সমস্যাৰ সৃষ্টি হৈছে ।
বৰষুণৰ বতৰত চাৰিচকীয়া বাহন পথটোৰে পাৰ হোৱাটো কষ্টকৰ হৈ পৰে । কিন্তু ৰাইজৰ সমস্যাৰ প্ৰতি গুৰুত্ব নাই ৰজাঘৰীয়াৰ । বাৰম্বাৰ আহ্বান জনোৱাৰ পাছতো পথটো মেৰামতি নকৰাত ক্ষুদ্ধ হৈ সোমবাৰে ৰাইজে ধৰ্ণা কাৰ্যসূচী ৰূপায়ণ কৰে । লগতে ৰাইজৰ সমস্যাক গুৰুত্ব দি শীঘ্ৰে পথটো মেৰামতি কৰিবলৈ দাবী জনাইছে ।
