আগৰতলা: অহা ২৯ জানুৱাৰীৰ পৰা আৰম্ভ হ’বলগীয়া ১৬ সংখ্যক বিত্ত আয়োগৰ আগন্তুক ভ্ৰমণৰ বাবে সাজু হৈছে ত্ৰিপুৰা চৰকাৰ । বিত্ত বিভাগৰ অতিৰিক্ত সচিব অকিঞ্চন সৰকাৰে কয় যে আয়োগৰ তিনিদিনীয়া ভ্ৰমণ ৩১ জানুৱাৰীত সমাপ্ত হ’ব ৷ ১ ফেব্ৰুৱাৰীত তেওঁলোকৰ যাত্ৰা নিৰ্ধাৰণ কৰা হৈছে ।
অকিঞ্চন সৰকাৰে কয়, “১৬সংখ্যক বিত্ত আয়োগ আহি আছে । ২৯ জানুৱাৰীৰ পৰা ৩১ জানুৱাৰীলৈ তিনিদিনীয়া ভ্ৰমণৰ বাবে আয়োগ উপস্থিত হ’ব । ১ ফেব্ৰুৱাৰীত তেওঁলোক ইয়াৰ পৰা যাত্ৰা কৰিব । সকলো স্তৰতে প্ৰস্তুতি পূৰ্ণগতিত চলি আছে আৰু সকলো জিলাতে সভা অনুষ্ঠিত কৰি মসৃণ কাৰ্যবিধি নিশ্চিত কৰা হৈছে ।” অধ্যক্ষ ড৹ অৰবিন্দ পানাগাৰিয়াৰ নেতৃত্বত গঠিত উচ্চ পৰ্যায়ৰ প্ৰতিনিধি দলটোত সদস্য অজয় নাৰায়ণ ঝা, এনি জৰ্জ মেথিউ, মনোজ পাণ্ডা, সৌম্যকান্তি ঘোষ, সম্পাদক হৃত্বিক পাণ্ডে উপস্থিত থাকিব ।"
লগতে পঢ়ক: বাংলাদেশৰ এটা মথাউৰি হৈ পৰিছে ত্ৰিপুৰাৰ বাবে চিন্তাৰ কাৰণ
অতিৰিক্ত সচিবগৰাকীয়ে লগতে কয়, "তেওঁলোকৰ প্ৰধান উদ্দেশ্য হৈছে ৰাজ্য চৰকাৰ আৰু জ্যেষ্ঠ বিষয়াসকলৰ সৈতে যোগাযোগ কৰি ত্ৰিপুৰাৰ আৰ্থিক প্ৰয়োজনীয়তা আৰু উন্নয়নমূলক পৰিকল্পনাৰ বিষয়ে আলোচনা কৰা ।" ৩০ জানুৱাৰীত দলটোৱে ত্ৰিপুৰাৰ বিত্ত বিভাগৰ সৈতে বৈঠকত মিলিত হোৱাৰ কথা । ইয়াৰ পিছত তেওঁলোকে ত্ৰিপুৰা সুন্দৰী মন্দিৰ, নাৰ্কেল কুঞ্জা, চাবিমুৰাকে ধৰি গুৰুত্বপূৰ্ণ পৰ্যটনস্থলীসমূহ পৰিদৰ্শন কৰাৰ সম্ভাৱনা আছে ।
ইফালে ত্ৰিপুৰাৰ চৰকাৰী সূত্ৰই প্ৰকাশ কৰা মতে, আয়োগে মুখ্যমন্ত্ৰী ড৹ মাণিক সাহা, আগৰতলা পৌৰ নিগমৰ প্ৰতিনিধি আৰু ত্ৰিপুৰা জনজাতি অঞ্চল স্বায়ত্তশাসিত জিলা পৰিষদৰ সৈতেও আলোচনা কৰাৰ সম্ভাৱনা আছে ।
লগতে পঢ়ক: নামভৰ্তিৰ নামত অধিক মাচুল ল'ব নোৱাৰিব ব্যক্তিগত চিকিৎসা মহাবিদ্যালয়ে
