ৰঙিয়া,28 চেপ্তেম্বৰ: ৰঙিয়াৰ বগৰীবাৰীত যোৱা প্ৰায় তিনি মাহে সম্পূৰ্ণ নহ'ল পুঠিমাৰী নৈৰ ভগ্ন মথাউৰিৰ পুনৰ নিৰ্মাণৰ কাম ৷ যাৰ ফলত এতিয়াও প্ৰায় অৰ্ধ শতাধিক গাঁও জলমগ্ন হৈ আছে ৷ টুলুঙা নাৱেৰেই বিপদসংকুল যাত্ৰা অব্যাহত ৰাখিছে স্থানীয় ৰাইজে ৷ অভিযোগ অনুসৰি,অতিকৈ লেহেমীয়া গতিত চলি থকা নিৰ্মাণৰ কামত জিঅ' বেগৰ পৰিৱৰ্তে চিমেন্টৰ বেগ ব্যৱহাৰ কৰিছে ঠিকাদাৰে ৷
আনহাতে মূল মথাউৰি নিৰ্মাণৰ পূৰ্বে নদীৰ সোঁতক বাধা দিবলৈ কিছুদিন পূৰ্বে অতি নিম্ন মানদণ্ডৰে ৰিং বান্ধৰ কাম সম্পূৰ্ণ কৰা হৈছিল যদিও, পুঠিমাৰী নৈৰ ঢলে পুনৰ চিগি নিয়ে সেই ৰিং বান্ধ ৷ যাৰ বাবে মথাউৰিটোৰ ভগ্ন পানী বৈ থকাৰ ফলত ৰঙিয়াৰ এক বৃহৎ অঞ্চল বৰ্তমানেও জলমগ্ন হৈ আছে ৷ মাত্ৰ 20-30 গৰাকী লোকেৰে নিৰ্মাণ কাৰ্য অব্যাহত ৰখাৰ লগতে ঠিকাদাৰৰ হেমাহিৰ বাবেই মথাউৰিটোৰ চিগাৰ প্ৰায় তিনি মাহৰ পাচতো এতিয়াও ৰাইজে দুৰ্ভোগ ভুগি থাকিবলগীয়া হৈছে ৷ ইমানৰ পাচতো জন প্ৰতিনিধি তথা বিভাগীয় কৰ্তৃপক্ষই মাজে-সময়ে সেই স্থান পৰিদৰ্শন কৰিবলৈ আহে যদিও,ৰাইজৰ সমস্যাক গুৰুত্ব প্ৰদান নকৰে বুলি অভিযোগ কৰিছে বানাক্ৰান্তই ৷
লগতে পঢ়ক: বাঢ়নি পানীয়ে উটোৱাই নিলে মাজুলীৰ শালমৰা-বনগাঁও সংযোগী দলং
