বকো, ৩ ফেব্ৰুৱাৰী: বিত্ত তথা স্বাস্থ্য মন্ত্ৰী ড০ হিমন্ত বিশ্ব শৰ্মাই জন্মদিনৰ কেক কাটি থকা সময়ত তোলা এখন ফটোত বকো সমষ্টিৰ বিধায়িকা নন্দিতা দাস থকাক লৈ এতিয়া চৰ্চা আৰম্ভ হৈছে ৰাজনৈতিক মহলত । তেওঁ বিজেপি দলত যোগদান কৰিব বুলিও ছ'চিয়েল মিডিয়াত অপপ্ৰচাৰ চলাইছে একাংশই । বুধবাৰে এই সন্দৰ্ভত প্ৰতিক্ৰিয়া প্ৰকাশ কৰে অসম প্ৰদেশ মহিলা কংগ্ৰেছ কমিটীৰ সভানেত্ৰী তথা বিধায়িকা নন্দিতা দাসে ।
তেওঁ কয় যে, এই বিশেষ ফটোখন কামৰূপ(গ্ৰাম্য)ৰ জিলা উপায়ুক্তৰ নতুন কাৰ্যালয়ৰ । উপায়ুক্ত কৈলাশ কাৰ্তিকৰ আমন্ত্ৰণমৰ্মে এই নতুন কাৰ্যালয়টোৰ উদ্বোধনী অনুষ্ঠানত অংশগ্ৰহণ কৰিছিল বিধায়িকা নন্দিতা দাসে । একেটা অনুষ্ঠানতে উপস্থিত আছিল মুখ্যমন্ত্ৰী সৰ্বানন্দ সোণোৱাল আৰু মন্ত্ৰী ড০ হিমন্ত বিশ্ব শৰ্মাৰ লগতে কমলপুৰৰ বিধায়কগৰাকীও । বিধায়িকা নন্দিতা দাসে প্ৰকাশ কৰা মতে, জিলা উপায়ুক্তগৰাকীয়ে বিধায়কসকলক নতুন কাৰ্যালয়ৰ কোঠাবোৰ দেখুৱাইছিল ।
জিলা উপায়ুক্তগৰাকীয়ে নিজৰ কোঠাটোও দেখুৱাবলৈ তেওঁলোকক লৈ গৈছিল আৰু সেই সময়ত কোঠাটোত মন্ত্ৰী ড০ হিমন্ত বিশ্ব শৰ্মাই কেক কাটি আছিল । কোঠাটোত মুখ্যমন্ত্ৰী সৰ্বানন্দ সোণোৱালো উপস্থিত আছিল । সেই সময়ত সকলো বিধায়ক, জিলা উপায়ুক্ত, অতিৰিক্ত উপায়ুক্তসহ কেইবাগৰাকীও বিষয়া উপস্থিত থকা বাবে সৌজন্যৰ খাতিৰত তেওঁ সেই কোঠাটোত উপস্থিত আছিল বুলি মন্তব্য কৰে বিধায়িকা নন্দিতা দাসে । আনহাতে, তেওঁ বিজেপি দলত যোগদান নকৰে বুলিও স্পষ্ট কৰি দিয়াৰ লগতে তেওঁ কংগ্ৰেছৰ এগৰাকী নিষ্ঠাবান কৰ্মী বুলিও মন্তব্য কৰে ।
লগতে পঢ়ক:ৰঙিয়াত মথাউৰি নিৰ্মাণৰ নামত ঠিকাদাৰৰ বৃহৎ দুৰ্নীতি
