ৰঙিয়া, ৪ জুন: এতিয়াৰে পৰা ঘৰতে প্ৰয়োজনীয় সামগ্ৰী লাভ কৰিব ৰঙিয়াৰ ৰাইজে । ৰঙিয়াত আৰম্ভ হৈছে হোম ডেলিভাৰী সেৱা । কৰ'ণাৰ সংক্ৰমণ নিয়ন্ত্ৰণ কৰাৰ বাবে প্ৰশাসনে নিৰ্দিষ্ট সময়ৰ বাবে সান্ধ্য আইন জাৰি কৰিছে । চৰকাৰৰ নিৰ্দেশ অনুসৰি দিনৰ ১১ বজাতে দোকান-পোহাৰ বন্ধ কৰা হৈছে ।
সেয়ে, বজাৰৰ পৰা সামগ্ৰী ক্ৰয়ৰ ক্ষেত্ৰত ৰাইজে অসুবিধাৰ সন্মুখীন হৈছে । ইফালে, কম সময়ৰ বাবে দোকানসমূহ খোলা হয় বাবে দোকানত যথেষ্ট ভিৰ হোৱা পৰিলক্ষিত হয় । সেয়ে, ৰাইজৰ সুবিধাৰ্থে ৰঙিয়াত চাৰিখন দোকানক হোম ডেলিভাৰী সেৱা আগবঢ়োৱাৰ অনুমতি দিয়া হৈছে । এতিয়াৰে পৰা গ্ৰাহকক ঘৰে ঘৰে গৈ সামগ্ৰীৰ যোগান ধৰা হ'ব ।
ৰঙিয়া প্ৰশাসন আৰু চেম্বাৰ্চ অৱ কমাৰ্চৰ সহযোগত ৰঙিয়াত আৰম্ভ হৈছে হোম ডেলিভাৰী সেৱা । প্ৰথম অৱস্থাত ৰঙিয়াৰ দাস ষ্টোৰ, এলাইট মাৰ্ট ,মাছুম ষ্টোৰ আৰু গীতাঞ্জলি এণ্টাৰপ্ৰাইজ এই ৪ খন দোকানৰ পৰা গ্ৰাহকে চাউল, দাইল, চেনী আদিকে ধৰি প্ৰয়োজনীয় সামগ্ৰী ফোন বা WhatsAppৰ জৰিয়তে সামগ্ৰীৰ অৰ্ডাৰ দিব পাৰিব ।
পুৱা ৬ বজাৰ পৰা সন্ধিয়া ৬ বজালৈ উপলব্ধ হ'ব এই সেৱা । এই হোম ডেলিভাৰী সেৱা সম্পূৰ্ণ বিনামূলীয়া হ'ব । এই সেৱা ৰঙিয়াৰ ১০ টা ৱাৰ্ডত উপলব্ধ হ'ব । মহামাৰীৰ সংকটৰ সময়ত ঘৰতে থাকি এনেদৰে প্ৰয়োজনীয় সামগ্ৰী লাভ কৰিলে ৰাইজ উপকৃত হব বুলি আশা কৰা হৈছে ।
লগতে পঢ়ক:সজাগতা সৃষ্টিৰ উদ্দেশ্যেৰে কাকপথাৰৰ কাছিজানত মাস্ক বিতৰণ
