লক্ ডাউনত বিপৰ্যস্ত 20 গৰাকী ফুল ব্যৱসায়ীৰ জীৱন

ফাঁচী বজাৰৰ এই বিশেষ গলিটোৰ পৰিচয় এওঁলোকৰ পৰাই.. কেবাবিধ নানাৰঙী ফুলে শোভা বৃদ্ধি কৰে এই ফুলৰ গলিটোৰ ৷ দিনটোৰ বাবে সতেজ ফুলবোৰৰ কিনা-বেচা হয় গলিটোত ৷ ফুলৰ মাজতেই জীৱনক উপলব্ধি কৰে এই গলিটোৰ ফুলৰ ব্যৱসায়ীসকলে..

হাজো, 14 এপ্ৰিলঃ কামৰূপ জিলাৰ তীৰ্থ নগৰী হাজোৰ অন্তৰ্গত অভয়পুৰৰ প্ৰায় 20 জন যুৱকে বিগত 15 বছৰে গাঁঠিৰ ধন ভাঙি 110 বিঘা মাটিত নাৰ্জী ফুলৰ খেতি কৰি আহিছে ৷ এইবেলিও ফুলৰ ব্যৱসায়ে যুৱক কেইজনক সঁহাৰি দিছিল যদিও প্ৰধানমন্ত্ৰীৰ 21 দিনীয়া লক্​ ডাউনৰ ফলত এতিয়া খেতি পথাৰতে শুকাই, সৰি পৰিছে নাৰ্জী ফুলবোৰ ৷ বিগত বৰ্ষৰ ডিচেম্বৰ মাহৰ পৰা 8 মাহে অতি কষ্টৰে নাৰ্জী ফুলৰ খেতি কৰিছিল যুৱক কেইজনে ৷ কিন্তু সময়ৰ ফুল সময়ত বিক্ৰী কৰিব নোৱাৰাৰ লগতে সাৰ-পানী যোগান ধৰিব নোৱাৰ ফলত মৰহি আহিছে ফুলবোৰ ৷ ফুলৰ লগে লগে ক্ৰমাৎ ম্লান পৰিছে কৃষকসকলৰ জীৱন ৷ আনৰ পৰা টকা ধাৰে লৈ খেতি কৰাৰ পাছত টকাখিনি উভতাই দিয়াটো বাদেই সুদ মাৰিবলৈয়ো সক্ষম নহয় যুৱক কেইজন ৷ উল্লেখ্য যে, লক্​ ডাউনৰ ফলত ক্ষতিৰ সন্মুখীন হোৱা ৬ লাখ খেতিয়কক মুখ্যমন্ত্ৰী সা -সজুঁলি যোজনা আচনিৰ অধীনত ৫ হাজাৰকৈ টকা সাহায্য প্ৰদান কৰা হ'ব ৷ ইতিমধ্যে ২৫০০ টকাকৈ মোকলাই দিছে বিত্ত বিভাগে ৷ কিন্তু এই পৰ্যন্ত এটকাও হাতত পৰা নাই এই কৃষকসকলৰ ৷ ফলত অসহায় হৈ বাৰে-বাৰে চৰকাৰৰ আগত হাতযোৰ কৰিছে যুৱক কেইজনে....