ৰঙিয়া, ২৯ মে': বানৰ কবলত পৰা ৰঙিয়াৰ বহু অঞ্চলৰ মৎস্য পালকৰ মাজত হাহাকাৰ অৱস্থা । বছৰৰ প্ৰথমটো বানতে বিধস্ত কেইবা শতাধিক মৎস্যপালক । বানপানীত ওলাই গৈছে বহু পুখুৰীৰ মাছ । ৰঙিয়াৰ জয়ন্তীপুৰ, দদোতিয়া, তাৰাকুছি, নিতেনী আদিৰ বহু লোকৰ মূল জীৱিকাই হৈছে মৎস্যপালন । এই মৎস্যপালনৰ দ্বাৰাই পোহপাল দি আহিছে নিজৰ পৰিয়ালক । যোৱা কিছুদিন ধৰি নেৰানপৰা বৰষুণৰ ফলত বিপদজ্বনক ভাবে বৃদ্ধি পাইছে বৰলীয়া নৈৰ জলস্তৰ ।
বৰলীয়া নৈৰ বাঢ়নী পানীয়ে অঞ্চলটোত থকা পুখুৰী বোৰ বুৰাই পেলোৱাত গোটেই মাছবোৰ ওলাই যোৱাত মূৰে-কপালে হাত দিছে মৎস্যপালক সকলে । তাৰোপৰি পানীৰ লগত অহা মেটেকাবোৰত আৱৰি ধৰাত আন এক সমস্যাৰ সৃষ্টি হৈছে । মৎস্যপালক সকলে পানীত নামি আতৰাব লগা হৈছে মেটেকাবোৰ।
ইফালে দিশহাৰা মৎস্যপালক সকলে প্লাষ্টিকৰ নেট দি পুখুৰীৰ চৌদিশ আৱৰাৰ চেষ্টা কৰিছে যদিও ইতিমধ্যে পুখুৰীৰ পৰা ওলাই গৈছে বহু মাছ । যাৰ বাবে পৰিয়াল পোহপাল দিবলৈ চৰকাৰৰ পৰা সহায় বিচাৰিছে মীনপালকসকলে ।
