ৰঙিয়া, 4 ডিচেম্বৰ: ড্ৰাগছৰ বিৰূদ্ধে ৰঙিয়াৰ পিতাম্বৰ হাট বজালীত আৰক্ষীৰ চলালে অভিযান (Anti drugs mission at Rangia) । ড্ৰাগছ মাফিয়া ৰেকিব আলী ওৰফে ফহিজৰ ঘৰত সোমবাৰে নিশা ৰঙিয়া আৰক্ষীয়ে চলায় এই অভিযান । আৰক্ষীৰ উমান পাইয়েই কুখ্যাত ড্ৰাগছ মাফিয়াটো পলাই সাৰিবলৈ সক্ষম হয় ৷
পৰৱৰ্তী সময়ত আৰক্ষীয়ে ৰেকিব আলীৰ ঘৰৰ লগতে ঘৰৰ চাৰিওফালে তন্ন তন্নকৈ পৰীক্ষা কৰে । আৰক্ষীৰ অভিযানকালত উদ্ধাৰ হয় ৫১ গ্ৰাম ব্ৰাউন চুগাৰ । উদ্ধাৰ হোৱা ব্ৰাউন চুগাৰখিনিৰ বজাৰ মূল্য প্ৰায় ৩ লাখ ৩০ হাজাৰ টকা বুলি আৰক্ষীয়ে প্ৰকাশ কৰে ৷ ব্ৰাউন চুগাৰখিনি উদ্ধাৰ হোৱাৰ পিছতে আৰক্ষীয়ে ড্ৰাগছ মাফিয়া ফহিজৰ ভগ্নীক আটক কৰে ৷ ৰঙিয়াৰ ভাৰপ্ৰাপ্ত আৰক্ষী বিষয়া ভাস্কৰমল্ল পাটোৱাৰীৰ নেতৃত্বত ছদ্মবেশত চলিছিল এই অভিযান ৷ ড্ৰাগছৰ বিৰূদ্ধে বৰ্তমানেও আৰক্ষীয়ে অভিযান অব্যাহত ৰাখিছে ।
উল্লেখ্য যে, ড্ৰাগছ সৰবৰাহত জড়িত থকাৰ অভিযোগত কেইবাবাৰো গ্ৰেপ্তাৰ কৰা হৈছিল ড্ৰাগছ মাফিয়া ৰেকিব আলী ওৰফে ফহিজক । কাৰাগাৰৰ পৰা জামিন লাভ কৰিয়েই পুনৰ ড্ৰাগছৰ ব্যৱসায়ত লিপ্ত হৈছিল ৰেকিব আলী ।
লগতে পঢ়ক: Uriamghat robbery: উৰিয়ামঘাটত চাঞ্চল্যকৰ ডকাইতি, এজনক আটক
